Buxoro, Namangan va Xorazm viloyatlarida umumiy quvvati 500 MVt bo‘lgan 3 ta quyosh fotoelektr stansiyasini qurish va ulardan foydalanish bo‘yicha o‘tkazilgan tender tanlovlarida g‘olib investorlar aniqlangandi. Energetika vazirligi Namangan viloyati uchun berilgan taklif qayta ko‘rib chiqilishini ma’lum qildi.
Tanlov natijalariga ko‘ra BAAning Masdar kompaniyasi Buxoro viloyatida 250 MVt quvvatga ega loyihani qurish va unda ishlab chiqarilgan elektr energiyasining bir kilovatt-soati uchun 3,044 AQSH senti miqdorida taklifi bilan g‘olib bo‘lgandi. Fransiyaning Voltalia kompaniyasi kompaniyasi Xorazm viloyatida 100 MVt quvvatga egaloyiha uchun ishlab chiqarilgan bir kilovatt-soat elektr energiyasini 2,888 AQSH sentida yetkazib berish taklifi bilan g‘olib deb topilgan.
Xitoyning GD Power — Powerchina konsorsiumi kompaniyasi esa Namangan viloyatida 150 MVt quvvatga ega loyiha uchun unda ishlab chiqarilgan bir kilovatt-soat elektr energiyasini 4,828 AQSH sentida yetkazib berish taklifi bilan g‘olib deb topilgandi. Energetika vazirligi ushbu loyiha bo‘yicha tarifni optimallashtirish yuzasidan qo‘shimcha muzokaralar o‘tkazilishini ma’lum qilgandi.
Iqtisodchi Otabek Bakirov quyosh stansiyalaridan 4,828 sentdan elektr juda qimmatligini aytdi.
“Ko‘rib turibsizki, yangi loyihalar bo‘yicha narxlar rosmana qimmatlagan. Bunga tender shakli va dizayni ham ta’sir ko‘rsatgan ko‘rinadi. Chunki birinchi marta 3 ta stansiya qurish bo‘yicha 3 ta lot tenderi bir vaqtda olib borildi. Bu uncha to‘g‘ri bo‘lmagan taktika, chunki quyosh stansiyasi qurish bo‘yicha busiz ham O‘zbekistonda 3-4 kompaniya ishlayapti xolos. Ular bir-biriga raqobat qilmasligi uchun bittadan lotni belgilab olgan bo‘lishlari ehtimoli ham yo‘q emas. Namangandagi stansiya vodiydagi birinchi quyosh stansiyasi bo‘ladi, energiya ta’minotidagi eng katta disbalansga ega hududda pochinni bunday boshlamaslik kerak”, — degan u.
Energetika vazirligi Namangan viloyatidagi quyosh fotoelektr stansiyasi uchun berilgan taklif qayta ko‘rib chiqilishini e’lon qildi.
“Haqiqatdan ham, Namangan viloyatida 150 MVt quvvatli loyiha uchun GD Power — Powerchina konsorsiumi (Xitoy) kompaniyasi tomonidan ishlab chiqarilgan bir kilovatt-soat elektr energiyasini 4,828 AQSH sentida yetkazib berish taklifi qimmat hisoblanadi. Shu munosabat bilan Energetika vazirligi ushbu taklifni juda qimmat deb hisoblaydi va ushbu loyiha bo‘yicha tarifni optimallashtirish yuzasidan qo‘shimcha muzokaralar o‘tkazilishini ma’lum qiladi”, — deyiladi vazirlik xabarida.
Ta’kidlanishicha, mazkur loyihani amalga oshirishda elektr energiyasi tarifini kamaytirish choralari ko‘riladi va stansiyaning qurilishida xavfsizlik tomonlariga alohida e’tibor beriladi.
Izoh (0)