Buxoro viloyati Shofirkon tuman sanitariya-epidemiologik osoyishtalik va jamoat salomatligi bo‘limi buyurtmachiligida o‘tkazilgan 591 million so‘mlik tender bekor qilindi. Bu haqda Korrupsiyaga qarshi kurashish agentligi axborot xizmati xabar berdi.
Unga ko‘ra, davlat xaridida sohaga oid qonunchilik talablariga amal qilinmagani aniqlandi. Xususan, ushbu xaridda ishtirok etgan 2 nafar tadbirkorning hujjatlari xarid komissiyasining kotibi foydalangan kompyuterning IP-manzili orqali elektron platformaga yuklangan.
Mazkur holatlar bo‘yicha 18-may kuni xarid komissiyasining bayonnomasini bekor qilish to‘g‘risida buyurtmachiga taqdimnoma kiritildi hamda holat bo‘yicha xizmat tekshiruvi o‘tkazish uchun Sanitariya-epidemiologik osoyishtalik va jamoat salomatligi xizmatiga so‘rovnoma kiritildi. Agentlikning taqdimnomasiga binoan 23-may kuni xarid komissiyasining bayonnomasi bekor qilindi.
Izoh (0)