Bosh prokuratura huzuridagi departament hamda DXX xodimlari tomonidan o‘tkazilgan tezkor tadbirlar davomida yer maydonlarining noqonuniy sotilishiga chek qo‘yildi.
Qayd etilishicha, departament hamda DXXning Namangan viloyati boshqarmalari tomonidan tezkor tadbir o‘tkazilgan. Tadbirda Kosonsoy tumani “Yo‘llardan foydalanish” UK rahbari A.I. fuqaro M.A.ga ishlab chiqarish faoliyati bilan shug‘ullanish uchun tumanning “O‘zbekiston” MFY hududidan 1 gektar yer maydonini tanishlari yordamida tender savdolariga qo‘ydirib, yutib olib berishi evaziga 10 ming dollarni olgan vaqtida ashyoviy dalillar bilan ushlangan.
Shuningdek, departamentning Payariq tuman bo‘limi tomonidan IIB xodimlari bilan hamkorlikda o‘tkazilgan tezkor-tadbirda, fuqaro Sh.A. tumandagi baliqchilik yo‘nalishiga ixtisoslashgan “K.O.” fermer xo‘jaligining 1 gektar yer maydonini fuqaro J.X.ga firibgarlik yo‘li bilan 17 ming AQSH dollariga sotishga kelishib, shundan 10 ming dollarni olgan vaqtida ashyoviy dalilar bilan ushlangan.
Departamentning Samarqand shahar bo‘limi tomonidan DXX xodimlari bilan hamkorlikda o‘tkazilgan tezkor-tadbirda esa A.K. ismli shaxs fuqaro F.T.ga Pastdarg‘om tumani “Elbek” MFYdagi zaxiradagi yer maydonidan 20 sotixini tanishlari yordamida hujjatlarini rasmiylashtirib olib berishi evaziga 9 ming dollarni olgan vaqtida ashyoviy dalillar bilan qo‘lga olingan.
Shu kabi, Departamentning Taxtako‘pir tuman bo‘limi tomonidan DXX va IIV xodimlari bilan hamkorlikda o‘tkazilgan tezkor tadbirda, A.G. ismli shaxs fuqaro A.Z.ga Nukus shahri hududidan zaxiradagi yer maydonidan 6 sotixini tanishlari yordamida hujjatlarini rasmiylashtirib olib berishi evaziga 23 million so‘mni olgan vaqtida ashyoviy dalillar bilan ushlangan.
Mazkur holatlar yuzasidan Jinoyat kodeksining 168-moddasi (firibgarlik) va 28, 211-moddasi (pora berish) bilan jinoyat ishlari qo‘zg‘atilib, tergov harakatlari o‘tkazilmoqda.
Noqonuniy yer savdolari
Aprel boshlarida Navoiyda 80 gektar yerni 1 milliard so‘mga sotishga uringan shaxslar qo‘lga olingani, Samarqand va Farg‘onada noqonuniy yer sotish holatlariga chek qo‘yilgani to‘g‘risida xabar berilgandi. Shuningdek, Qoraqalpog‘iston Respublikasi va Buxoro viloyatida yer maydonlari savdosi bilan bog‘liq firibgarlik holatlari fosh etilgan edi.
Izoh (0)