Prezidentning “O‘zbekiston Respublikasida 2024–2030-yillarda davlat-xususiy sheriklikni rivojlantirish chora-tadbirlari to‘g‘risida”gi qarori qabul qilindi.
Qarorga ko‘ra, quyidagilar tasdiqlandi:
- 2024–2026-yillarda ustuvor davlat-xususiy sheriklik loyihalarini amalga oshirish bo‘yicha chora-tadbirlar;
- 2024–2030-yillarda davlat-xususiy sheriklik asosida amalga oshiriladigan loyihalar dasturi.
Bunda:
- yillik energiya yo‘qotishlarini kamida ikki baravar pasaytirishni belgilagan holda barcha hududlarda elektr taqsimlash tarmoqlarini 2027-yil 1-iyulga qadar;
- tabiiy gaz taqsimlash tarmoqlarini esa 2027-yil yakuniga qadar xususiy operatorlarga topshirishni nazarda tutuvchi shartnomalarni imzolash inobatga olinadi.
Qarorda belgilanishicha, 2025-yil dekabr oyida Samarqand viloyatida elektr tarmoqlarini modernizatsiya qilish va xususiy operatorga o‘tkazish bo‘yicha tender g‘olibini eʼlon qilish rejalashtirilgan. Loyiha qiymati 250 mln dollarga baholanmoqda.
Shuningdek, Andijon viloyatida 2027-yilning 4-choragida elektr tarmoqlarini modernizatsiya qilish, qurish va xususiy operatorga berish loyihasini amalga oshirish rejalashtirilgan.
Bundan tashqari, Samarqand va Buxoro viloyatlarida 2026 va 2027-yillarning 4-choragida mos ravishda gaz taqsimlash tarmoqlari bo‘yicha shunga o‘xshash loyihalar nazarda tutilgan.
Qarorda, shu bilan birga, yiliga qo‘shimcha 30 foizgacha elektr energiyasini tejash maqsadida 2028-yilga qadar barcha maʼnan eskirgan irrigatsiya nasos stansiyalarini modernizatsiya qilish bo‘yicha kelishuvlar erishish belgilab qo‘yilgan.
Shuningdek, toza va doimiy ichimlik suvi bilan taʼminlash qamrovini 87 foizga, markazlashgan oqova suv taʼminoti qamrov darajasini 30 foizgacha oshirishni nazarda tutgan holda 2028-yil yakuniga qadar har bir hududda ichimlik va oqova suv tarmoqlarini modernizatsiya qilish va boshqaruvga berish uchun xususiy kompaniyalar jalb qilinishi qayd etilgan.
Izoh (0)