31-yanvar kuni O‘zbekiston Respublikasi tovar-xomashyo birjasida 100 dan ortiq tenderlar amalga oshirildi. “Daryo” muxbiri Abduqahhor Qosimov hujjatlarni monitoring qilib, eng e’tiborga molik savdolar haqida ma’lumot beradi.
Qarindoshlar yana 1 milliard so‘mlik tenderni yutib oldi
20-yanvar kuni “Daryo” internet-nashrida Uz Chasys MCHJ o‘tkazgan tenderda ishtirok etgan And Cargo Trans Service va Zafarbek Cargo Trans Servis korxonalari qarindoshlik aloqalari bilan bog‘langani haqida material e’lon qilingandi. Shundan so‘ng Uz Chasys korxonasi holatni tasdiqlab, tender yuzasidan tuzilgan shartnomani bekor qildi. “Daryo” kuzatuvlariga ko‘ra, bir-biriga afillangan ushbu korxonalar ishtirokidagi tenderlar hali ham davom etmoqda.
31-yanvar kuni transport vositalari qismlarini ishlab chiqarish bilan shug‘ullanuvchi Uz-Dong Won Co qo‘shma korxonasi tashish va yetkazib berish xizmati uchun o‘tkazgan tender yakunlandi. Boshlang‘ich qiymati naq 1 milliard 1 million 600 ming so‘m bo‘lgan lotda yuqoridagi And Cargo Trans Service va Zafarbek Cargo Trans Servis MCHJlar ishtirok etgan.
.jpg)
.jpg)
Gap shundaki, ushbu ikki korxona ta’sischilari hisoblangan Ismanov Muxiddin Gulamjanovich va Ismanova Fatmaxon Igemberdiyevna 100 foiz ulush bilan afillangan shaxslar hisoblanadi. Ushbu tenderda “Davlat xaridlari to‘g‘risida”gi qonunning 14-moddasida (manfaatlar to‘qnashuvi) ko‘rsatilgan qonun talablari qo‘pol ravishda buzilgan.
“Daryo” muxbiri holat yuzasidan tadbirkorlar fikrini o‘rganish maqsadida ular bilan bog‘lanishga urindi. Ammo ko‘rsatilgan aloqa telefon raqamlaridan biri vaqtincha ish faoliyatida emas ekan. Ikkinchi raqamga qilingan qo‘ng‘iroqni ko‘targan shaxs adashib tushganimizni bildirdi.
Tasodiflar ketma-ketligi
Xavfsiz daryo boshqarmasi kanal va suv omborlari qurilmalarini tozalash ishlarining loyiha hujjatlarini ishlab chiqish uchun 24,5 million so‘mlik tender o‘tkazdi. Unda 2 ta ishtirokchi qatnashdi va “Yo‘l Uy Suv Loyiha” MCHJ g‘olib, New Road Water Project zaxira g‘olib deb topildi.
Raqobatchilarning rahbariyati, ochiq ma’lumotlari bilan tanishish jarayonida ikkita shubhali holatga duch keldik.
Tender g‘olibi “Yo‘l Uy Suv Loyiha” MCHJning ta’sischisi va rahbari Tursunova Zuxra Namoz qizi. Korxona Toshkent shahri Olmazor tumanida joylashgan.
New Road Water Project MCHJning rahbari Xudoyshukurov Quvonchbek Tojimurodovich. Korxona Toshkent shahri Chilonzor tumanida joylashgan.
Ma’lumotlarga e’tibor berilsa, ikkala tadbirkorlik subyektlarining aloqa telefon raqamlaridagi so‘nggi 4 ta raqam bir xil: 41 76.
Bundan tashqari, g‘olib MCHJning elektron pochta manzili mana bunday: nr_waterproject@mail.ru. Raqobatchi korxonaning nomiga juda o‘xshab ketadi.
Bu yerda qonun buzilish holati bormi yo bular shunchaki tasodifmi? Mas’ullardan izoh kutib qolamiz.
Raqobatchilarning bir xil telefon raqamlari
Surxondaryo viloyati 2-son ruhiy-asab kasalliklari shifoxonasi bemorlarni yuvintirish xizmati (hammom) uchun boshlang‘ich qiymati 42 million 900 ming so‘mlik tender o‘tkazdi. Unda “Surxon Yoqut Sifat” va Suppliers Sale MCHJlar raqobat olib bordi.
Komissiya a’zolarining yakuniy baholariga ko‘ra, tenderni 90 ball bilan “Surxon Yoqut Sifat” MCHJ yutib oldi, Suppliers Sale esa zaxira g‘olib.
Tender ishtirokchilarining ma’lumotlari bilan tanishish jarayonida ushbu ikki raqobatchi korxonaning aloqa telefon raqamlari bir xil ekani ma’lum bo‘ldi.
“Daryo” muxbiri ko‘rsatilgan raqamga qo‘ng‘iroq qildi. Go‘shakni o‘zini Shamsiddin Xalmurotovning o‘g‘li deb tanishtirgan shaxs ko‘tardi. U Suppliers Sale korxonasi faoliyatini o‘zi yuritishini, yuqoridagi tenderda yutqazib qo‘yganini aytdi.
“Ammo telefon raqamlar bir xil ekani haqida ma’lumotim yo‘q. Balki adashishgandir. Bu yerda hech qanday tanish-bilishchilik bo‘lgan emas”, — deb ta’kidladi u.
Abonent apparati o‘chirilgan
Farg‘ona viloyati Dang‘ara tumani markazlashgan Tibbiyot birlashmasi shifoxonadagi generatorni ta’mirlash uchun 31 million 860 ming so‘mlik tender o‘tkazdi. Unda ham yuqoridagi kabi holatga duch keldik.
Lotni yutib olish uchun Market Magnet MCHJ va “Ziyo Fahir Nuri” MCHJ kurash olib bordi. Yakunda Market Magnet g‘olib deb topildi.
Statistika agentligi ma’lumotlariga ko‘ra, Dang‘ara tumanida joylashgan ushbu ikki korxona ta’sischi va rahbarlari boshqa-boshqa odamlar. Ammo aloqa telefon raqamlari bir xil, shuningdek, pochta manzillarida ham o‘xshashlik mavjud.
“Daryo” muxbiri ko‘rsatilgan raqamga qo‘ng‘iroq qilganida “abonent apparati o‘chirilgan” ekani ma’lum bo‘ldi.
Qonunga e’tirozi bor tadbirkor
Buxoro elektr bilan ta’minlash distansiyasi yengil yuk transportlarini ta’mirlash xizmati uchun boshlang‘ich qiymati 135 million so‘mlik tender o‘tkazdi. Unda ikkita MCHJ ishtirok etdi.
E’tiborlisi, tender g‘olibi bo‘lgan Buxara Auto Leader, zaxira g‘olib Pit Stop Avto MCHJlar bir tadbirkorga tegishli hisoblanadi.
“Daryo” muxbiri Ergashev Shahriyor bilan bog‘landi. Uning ma’lum qilishicha, tender 31-yanvar kuni bekor qilingan, ammo tadbirkorga yetarlicha tushuntirish berilmagan.
“Tenderni bekor qildik, deyishdi. Lekin nega? Ha, to‘g‘ri, men ikkita korxona bilan ishtirok etgandirman, ammo hech kimni cheklaganim yo‘q, istalgan odam kirishi, qatnashishi mumkin edi. Qonunga e’tirozim bor”, — dedi u.
Mas’ullardan ushbu shubhali tenderlar natijalariga e’tibor qaratib, noqonuniy holatlar bo‘yicha tegishli choralar ko‘rishni so‘raymiz.
Izoh (0)