AQSH prezidenti Donald Tramp Rossiya va Ukraina prezidentlari Vladimir Putin hamda Vladimir Zelenskiyni qaysar deb atadi. U buni muzokaralar jarayoni boshlanganiga qaramay, harbiy harakatlar davom etayotgani bilan izohladi.
“Men Putin bilan ko‘p narsalarni boshdan kechirdim. Muzokaralar davomida Kiyev kabi shaharlarni o‘qqa tutish davom etganida juda hayron bo‘ldim. Nafaqat Putin, balki Zelenskiy ham — ikkalasi ham juda qaysar”, dedi Tramp Oq uyda jurnalistlarga.
Uning aytishicha, muzokaralar jarayoni tez va muvaffaqiyatli yakunlanishiga allaqachon umid qilgan. Biroq Trampning so‘zlariga ko‘ra, 16-may kungi muzokaralarning birinchi raundidan so‘ng Rossiya raketa hujumlarini qayta boshlagan. AQSH prezidenti bundan “juda hafsalasi pir bo‘lganini” ma’lum qildi .
Rossiya Mudofaa vazirligining qayd etishicha, ular faqat “maxsus operatsiya doirasida harbiy nishonlarga zarba bermoqda”.
Rossiya 28-may kuni 2-iyunda Istanbulda Ukraina bilan to‘g‘ridan to‘g‘ri muzokaralarning ikkinchi bosqichini o‘tkazishni taklif qilgandi. Kiyev bunga javoban tomonlar pozitsiyalarini aniqlashtirish shartini qo‘ygan.
Istanbulda 16-may kuni so‘nggi uch yil ichida ilk bor Rossiya va Ukraina o‘rtasida to‘g‘ridan to‘g‘ri muzokaralar bo‘lib o‘tdi. Rossiya delegatsiyasiga Rossiya prezidenti yordamchisi Vladimir Medinskiy, Ukraina delegatsiyasiga esa mudofaa vaziri Rustem Umerov boshchilik qildi. Uchrashuv taxminan ikki soat davom etdi va bir qator kelishuvlar “mingga ming” formulasi bo‘yicha harbiy asirlarni almashish, o‘t ochishni to‘xtatish rejalarini tayyorlash va keyingi uchrashuv bo‘yicha prinsipial kelishuv bilan yakunlandi.
Izoh (0)