Toshkentdagi Hyatt Regency mehmonxonasida Agrobankning “Agrobooks” loyihasi doirasida tayyorlangan “Suv kitob” metodik to‘plami taqdimoti bo‘lib o‘tdi.
Agrobank qishloq xo‘jaligi sohasini moliyaviy va ilmiy jihatdan qo‘llab-quvvatlash maqsadida qator loyihalarni amalga oshirmoqda. Ularning navbatdagisi — Suv xo‘jaligi vazirligi va “TIQXMMI” milliy tadqiqot universiteti bilan hamkorlikda ishlab chiqilgan “Suv kitob” to‘plamidir.
To‘plam suvdan oqilona foydalanishga bag‘ishlangan 30 ta metodik qo‘llanmani o‘z ichiga oladi. Ularni tayyorlash jarayonida Xitoy va Turkiya kabi mamlakatlarning ilg‘or tajribalari o‘rganilgan, 50 nafarga yaqin professor va mutaxassislar ishtirok etgan. Qo‘llanmalarda zamonaviy sug‘orish texnologiyalari, avtomatlashtirilgan tizimlar, ekinlarni sug‘orish meʼyorlari va suvdan samarali foydalanish bo‘yicha amaliy tavsiyalar bayon etilgan.
Fermer va dehqonlar uchun to‘plamning video va audio shakllari ham tayyorlangan. Videodarslar “Fermerlar maktabi” platformasiga joylashtirilgan.
To‘plam yil yakuniga qadar bosma va elektron shaklda bepul tarqatilib, mamlakatimiz bo‘ylab barcha fermer va dehqonlarga yetkaziladi. Ushbu tashabbus suv xo‘jaligini ilmiy asosda rivojlantirish hamda amaliy bilimlarni keng targ‘ib qilishga xizmat qiladi.
Maʼlumot o‘rnida, “Agrobooks” loyihasi doirasida avvalroq Turkiya tajribasi asosida O‘zbekiston iqlimiga moslashtirilgan “100 kitob to‘plami” hamda “O‘simliklar himoyasi” sohasiga oid 40 ta metodik qo‘llanma ham yaratilgan edi.
Agrobank bunday tashabbuslar orqali qishloq xo‘jaligi va suv xo‘jaligi sohalarini moliyaviy hamda ilmiy qo‘llab-quvvatlashni izchil davom ettiradi.
Reklama huquqi asosida.
Izoh (0)