“Daryo”da Toshkentdagi “dom”da sodir bo‘lgan portlash 6 ta xonadon egasini “ko‘chada qoldirgani”, Mirzo Ulug‘bek tumani hokimi esa vaʼda berishdan nariga o‘tmayotgani hikoya qilingandi. Aholi vakillari shuningdek, Mirzo Ulug‘bek tumani hokimligi axborot xizmatining “Daryo”ga bildirishicha, poytaxt hokimligi tomonidan uysiz qolgan aholining yangi xonadon sotib olishi uchun mablag‘ ajratilgan.
O‘sha noxush holatdan keyin shu kunning o‘zida shaxsan tuman hokimi, shahar hokimiyati bilan birgalikda hududda yashovchi fuqarolarni mehmonxonaga joylashtirdi. Aholi oziq-ovqat bilan taʼminlandi. Odatda aholiga to‘lanadigan kompensatsiya Toshkent shahar hokimiyati, Xalq deputatlari shahar kengashidan o‘tib keyin tuman hokimligiga keladi. Bunga ozgina vaqt kerak bo‘ldi. Shu sabab kechikish ro‘y berdi. Bugun shu masala hal bo‘ldi. Endi aholi uzog‘i bilan uch-to‘rt kun ichida kompensatsiya pullarini oladi, deydi Mirzo Ulug‘bek tumani hokimligi axborot xizmati rahbari Maʼmur Parmonov.
Hokimlik vakili jabrlangan fuqarolarga murojaat qilib, tuman hokimligining uy-joy bo‘limiga borib, hujjatlarni taqdim etishlarini so‘ramoqda.
Odamlar qancha tez hujjatlarini taqdim etishsa, shuncha tez pulni olishadi, deydi hokimlik masʼuli.
Masʼullarning aniqlik kiritishicha, hokimlik ikki xonali uyidan ajralgan fuqarolarga 715 million so‘m miqdorida kompensatsiya to‘lab berishni lozim topgan. Shuningdek, portlatilgan uyning tom qismi va zararlangan hududlarni ta‘mirlashni boshlagan.
Bu pulga aynan o‘zimiz yashab kelgan Qorasuv-4 hududidan o‘zimizni uyimizdek ikki xonali uy ololmaymiz. Bu hududda narxlar juda qimmat. Shu sabab hokimlikdan pul miqdorini o‘ylab ko‘rishlarini so‘ragan bo‘lar edik, deydi jabrlanuvchi aholi vakillari.
Mirzo Ulug‘bek hokimligi masʼulining bildirishicha, bu narx mustaqil baholash markazlari tomonidan bugungi bozor o‘rganilgan holda hisob-kitob qilingan.
Uylar narxi davlat tashkilotlari tomonidan baholanmagan. Bozor o‘rganilib, mustaqil baholash markazlari tomonidan Qorasuv-4 dagi ko‘p qavatli uylar narxidan kelib chiqib belgilangan. Shuningdek, o‘sha baholangan summadan kerak bo‘lsa ortig‘i bilan to‘lab berish imkoniyatlari ko‘rib chiqilgan, deydi Maʼmur Parmonov.
Hokimiyat axborot xizmati rahbari “Daryo” jurnalistining “Aholida hokimlik ajratgan pulga uy ololmaymiz, bu kam, bizga pul emas uy olib berishsin deb talab qo‘yish imkoni bormi?”, degan savoliga “Boshida odamlar o‘z takliflarini bildirishgan, uy emas kompensatsiya maʼqul deyishgan”, deb javob berdi.
Eslatib o‘tamiz, 2025-yilning 1-mart kuni Toshkent shahrining Mirzo Ulug‘bek tumanida portlatilgan xonadon sabab ko‘p qavatli uyda yashovchi aholi vakillari uysiz qolgandi. Toshkent shahri hokimi hamda Mirzo Ulug‘bek tumani rahbari jabrlangan aholi vakillari bilan ko‘rishib, ular 10 kunda uyli bo‘lishini, muammo hal etilishini vaʼda qilishgandi. “Dom”dagi xonadonini portlatgan fuqaro buni oshxonadagi gaz plitasini yoqish orqali amalga oshirgan. Natijada gaz havo aralashmasi chaqnashi sodir bo‘lib, yong‘in kelib chiqqan. Shundan so‘ng ham niyatiga yetmagan fuqaro to‘qqizinchi qavatdan o‘zini tashlash orqali joniga qasd qilgan.
Izoh (0)