Yozning jazirama kunlarida konditsioner, vetilyator kabi havoni salqinlashtiruvchi jihozlar jonimizga oro kiradi. Konditsionerdan to‘g‘ri foydalanish uning uzoq yil xizmat ko‘rsatishini ta’minlaydi. Ko‘pchilik, konditsioner yoqilganida deraza va eshiklar yopiq turishi kerak, deb hisoblaydi. Haqiqatdan shundaymi? Quyida ushbu savolga javob topishga urinib ko‘ramiz.
Agar maqsadingiz xonani tez sovutish bo‘lsa, konditsioner yoqilganda derazani yopish maqsadga muvofiqdir. Ochiq deraza qurilmaning samaradorligini pasaytiradi: sovutilgan havo tashqariga chiqib ketadi, iliq havo esa ichkariga kiradi. Natijada kompressor uzoqroq ishlaydi va elektr energiyasi ko‘proq sarflanadi.
Biroq, havo sifati nuqtayi nazaridan, derazani uzoq vaqt davomida butunlay yopish xatodir. Konditsioner toza havo bermaydi va xonani kislorod bilan to‘yintirmaydi. U faqat mavjud havoni aylantirib, sovutib turadi. Agar xonadagi barcha deraza va eshiklar yopiq bo‘lsa, vaqt o‘tishi bilan kislorod miqdori kamayadi, karbonat angidrid gazi esa ko‘payadi. Bu uyquchanlik, charchoq va bosh og‘irligini keltirib chiqaradi. Bu holat, ayniqsa, uzoq vaqt davomida bir necha kishi bo‘lgan kichik xonalarda yaqqol seziladi.
Eng yaxshi yechim — xonani muntazam ravishda shamollatib turishdir: har soatda kamida 5-10 daqiqaga derazani ochib turing. Yoki havo kirish klapanlari va filtrli ventilyatsiya tizimlaridan foydalaning — shunda salqinlikni saqlab, toza havoga ega bo‘lasiz. Toza havo kirmasa, hatto salqin xona ham dim bo‘lib tuyuladi.
Izoh (0)