Volkswagen konserni e’lon qilgan keng ko‘lamli qisqartirishlar doirasida uning 20 ming xodimi mehnat shartnomasini muddatidan oldin bekor qilishga rozi bo‘ldi. Bu haqda konserning Volfsburgdagi bosh qarorgohida bo‘lib o‘tgan ishlab chiqarish kengashi yig‘ilishiga asoslanib, Bild gazetasi xabar bermoqda.
Nashr ma’lumotlariga ko‘ra, ularning qariyb uchdan ikki qismi nafaqaga chiqadi. Ta`kidlanishicha, shunday qilib avtomobil ishlab chiqaruvchisi xarajatlarni kamaytirish bo‘yicha chora-tadbirlar majmuasini amalga oshirishda sezilarli natijalarga erishmoqda.
Ma`lum qilinishicha, murakkab muzokaralardan so‘ng VW direktorlar kengashi va xodimlar manfaatlarini himoya qiluvchi IG Metall sanoat kasaba uyushmasi o‘tgan yil oxirida Volkswagen asosiy brendi uchun xarajatlarni qisqartirish dasturi bo‘yicha kelishuvga erishgan. Dastur 2030-yilgacha jami 35 mingta ish o‘rnini, asosan konsernning Germaniya Federativ Respublikasidagi zavodlarida qisqartirishni nazarda tutadi. Qisqartirishlar ijtimoiy jihatdan maqbul tarzda amalga oshirilishi va bu jarayonga jalb qilingan xodimlar o‘z roziliklarini berishlari lozim.
“Xodimlar ishdan bo‘shatish nafaqasini ish stajiga qarab oladilar. Bu 400 ming yevrogacha yetishi mumkin”, deya tushuntiradi Bild.
Ish o‘rinlarini qisqartirishdan tashqari, 2026-yildan boshlab Volkswagen har yili taklif qilinadigan amaliyot o‘rinlari sonini 1,4 mingdan 600 tagacha kamaytiradi. Ushbu chora-tadbirlar tufayli avtokonsern har yili ishchi kuchi xarajatlaridan 1,5 milliard yevro tejashni mo‘ljallamoqda.
Bundan tashqari, VW’ning 130 mingga yaqin xodimi ish haqini muzlatishga rozi bo‘lgan. 5 foizlik oshirish o‘rniga, bu mablag‘ maxsus jamg‘armaga yo‘naltiriladi, ushbu mablag‘larddan, masalan, moslashuvchan ish jadvallari moliyalashtiriladi. Shu bilan birga, oshirilgan ta’til nafaqasi to‘lovi bekor qilinadi.
“IG Metall ma’lumotlariga ko‘ra, ushbu choralar VW zavodlari yopilishining oldini olgan. Biroq Germaniya avtomobil ishlab chiqaruvchilarining zaifligi davom etayotganini hisobga olinsa, bu va’daning uzoq muddat saqlanib qolishi gumon”, deya xulosa qilmoqda Bild.
Izoh (0)