Buyuk Britaniyalik ikki yoshli Jozef Harris-Bertill eng yuqori intellektual darajadagi insonlarni birlashtirgan xalqaro Mensa jamiyatining eng yosh aʼzosi bo‘ldi. Uning IQ darajasi 98 ballga baholandi.
Bolaning test natijalari hakamlar hayʼatida hayratlanarli taassurot qoldirdi. Jozefning ota-onasi Rouz va Devid olimlar bo‘lib, universitetda dars berishadi. Ular o‘g‘illarining g‘ayrioddiy qobiliyatlarini chaqaloqligidayoq payqashgan. Go‘dak besh haftaligida ag‘darila boshlagan, yetti oyligida ilk so‘zlarini aytgan va bir yarim yoshida birinchi kitobini boshidan oxirigacha ovoz chiqarib o‘qib chiqqan.
— Ikki yoshga endi to‘lganida u bir o‘tirishda 10 daqiqagacha ovoz chiqarib ravon o‘qiy olardi, 1 dan 10 gacha beshta tilda sanay olardi va 100 gacha to‘g‘ri hamda teskari tartibda sanashni bilardi, deb aytdi Rouz.
Ota-onasining taʼkidlashicha, Jozef juda qiziquvchan bo‘lib, murakkab mavzularni — Morze alifbosi, yunon alifbosi va Mendeleyev davriy jadvalini o‘rganishga kirishgan.
— U murakkab vazifalarni yoqtiradi va shaxmat o‘ynash yoki yangi so‘zlar va tushunchalarni o‘rganish kabi qiyinchiliklarni yengib o‘tganda, haqiqatan ham ruhlanib ketadi, deb qo‘shimcha qiladi Rouz.
Jozefning o‘qish qobiliyati yaxshi rivojlanganini sezgan ota-onasi Mensaga murojaat qilishga qaror qilishdi. Bu jamiyat faqat IQ test natijalari bo‘yicha eng yuqori ball to‘plaganlarni — eng yaxshi 2 foizlikka kiruvchilarni qabul qiladi.
Mutaxassislar bunday yoshda jadal taʼlim olish haqida qanday fikrda
— Bunday hollarda bolaning hissiy rivojlanishi aqliy rivojlanishidan orqada qoladi. Hozirgi kunda hatto pediatrlar ham ota-onalarga bolalardagi bunday tendensiyalarni kuzatib, taʼlim jarayonini sekinlashtirishni tavsiya etmoqdalar.
Maktabda aqliy qobiliyatlari bilan boshqalardan ajralib turadigan, ammo tengdoshlari bilan muloqot qilishda qiynalayotgan aʼlochi o‘quvchilar uchraydi. Ko‘plab iqtidorli bolalar odatda odamlar bilan munosabat o‘rnatishda qiyinchilikka duch kelishadi.
Biroq psixolog taʼkidlaydi: istisnolar ham bo‘ladi.
— Ota-onalar barcha sohalarda muvozanatga erishish uchun bolaning hissiy rivojlanishiga ham eʼtibor qaratishlari maqsadga muvofiq: sayr qilish, maydonchada boshqa bolalar bilan o‘ynash, vaqtni unumli o‘tkazish kabi faoliyatlarni yo‘lga qo‘yishlari yaxshi natija beradi.
Ota-ona bolaning dunyoqarashini kengaytirishi, doimo boshqalarning his-tuyg‘ulariga eʼtibor qaratishga undashi lozim. Bu juda muhim, deb taʼkidlaydi mutaxassis.
2023-yildagi avvalgi rekordni kentukkilik Ayla Maknabb o‘rnatgan edi. U Mensa tashkilotiga ikki yosh-u 195 kunligida aʼzo bo‘lgan. Britaniyalik go‘dak undan 13 kun kichik.
Izoh (0)