AQSHning Virjiniya shtatida hukumat xodimi bo‘lgan shaxs 29-may kuni maxfiy ma’lumotlarni xorijiy davlat vakiliga yetkazishga uringani uchun hibsga olindi. Bu haqda Fox News xabar berdi.
28 yoshli Natan Laatsch 2019-yildan beri Mudofaa razvedka agentligida (MRA) IT mutaxassisi sifatida ishlagan. 2025-yil mart oyida Federal qidiruv byurosi (FQB)ga kimdir xorijiy davlatga maxfiy ma’lumot yetkazmoqchi, degan xat kelgan. Shundan so‘ng Laatsch hibsga olingan.
Laatsch MRAning Ichki tahdidlar bo‘limida ishlagan va maxfiy darajadagi xavfsizlik ruxsatnomasiga ega bo‘lgan. FQBga yuborilgan elektron xatda, bu shaxs Tramp ma’muriyati qadriyatlariga qo‘shilmasligi va o‘zida bor maxfiy ma’lumotlarni, jumladan, tayyor razvedka hisobotlari, hali qayta ishlanmagan ma’lumotlar va boshqa hujjatlarni ulashishga tayyor ekani yozilgan.
Laatsch o‘zini xorijiy hukumat rasmiysi deb tanishtirgan FQB agenti bilan bir necha marta muloqot qilgan va maxfiy ma’lumotlarni ulashishga tayyorligini bildirgan.
FQB shimoliy Virjiniyadagi bog‘da operatsiya uyushtirgan. U yerda Laatsch maxfiy ma’lumotni ulashishi kerak bo‘lgan. 1-mayda uni belgilangan joyda ma’lumot qoldirayotganini ko‘rishgan. U ketgach, FQB xodimlari joydan fleshka topishgan. Unda Laatschdan xabar va juda maxfiy bir nechta hujjatlar bo‘lgan.
7-may kuni Laatsch fleshka topilganini bilganidan keyin FQB agentiga yana xabar yuborib, evaziga biror narsa olish istagini bildirgan. 8-may kuni u xorij fuqaroligini olishga qiziqayotganini, chunki Amerikada vaziyat yaqin yillarda yaxshilanishiga ishonmasligini aytgan. Shuningdek, moddiy mukofotga qarshi emasligini bildirgan.
14-may kuni FQB agenti undan yana qo‘shimcha ma’lumot so‘ragan. 15-maydan 27-maygacha Laatsch yana ma’lumotlarni ko‘chirib, yashirincha tashqariga olib chiqishni boshlagan.
29-may kuni u oldindan kelishilgan joyga ma’lumotni topshirish uchun kelganida hibsga olingan. Endi u 30-may kuni Virjiniya shtatining sharqiy okrugida sud qilinadi.
Izoh (0)