Франция президенти Эммануэл Макрон кузда парламентни махсус сайловлар ўтказиш учун тарқатиб юбориш имкониятини кўриб чиқмоқда. Бу ҳақда Bloomberg агентлиги хабар бермоқда.
“Макрон парламентни тарқатиб юбориш ва шу йилнинг кузида махсус сайловларни ўтказиш имкониятини ўрганмоқда. Чунки унинг халқаро майдонда тан олиниши Франция Президентининг ўз фуқаролари орасида машҳурлигини оширишга ёрдам беради”, дейилади материалда.
Нашр манбаларига кўра, сўнгги ҳафталарда Макрон бу масала бўйича ўзининг яқин атрофидагилар билан маслаҳатлашган, аммо ҳозирча ҳеч қандай қарор қабул қилмаган.
Агар Франция президенти ўз режаларидан воз кечса, кейинги парламент сайловлари фақат 2029 йилда бўлиб ўтади.
Макрон 2024 йилнинг 9 июнида ҳам Франция парламентини тарқатиб юборган ва навбатдан ташқари сайловлар ўтказилганди. Бунга Европа парламентига сайловларда президент Макроннинг “Ренессанс” партияси ўта ўнгчи мухолифатга ўз ўрнини бой бергани сабаб бўлганди.
Франция тизимига кўра, парламент сайловлари қуйи палатанинг 577 нафар аъзосини — Миллий ассамблеяни сайлаш учун ўтказилади. Мамлакат президентини танлаш учун эса алоҳида сайловлар тизими мавжуд.
2022 йилда бўлиб ўтган парламент сайловларининг сўнгги босқичида Макроннинг “Ренессанс” партияси кўпчилик овоз тўплай олмай, коалиция тузишга мажбур бўлган эди.
Макрон 17 апрель куни Парижда бўлиб ўтган Украинадаги можарони ҳал қилиш бўйича музокаралар натижаларини изоҳлаб, мунозараларни ижобий ва конструктив деб атаганди.
Апрель ойи бошида Франция президенти яқин ойларда унинг мамлакати Фаластин давлатини тан олиши мумкинлигини айтганди.
Изоҳ (0)