Канаки-Янги Каледониядаги тартибсизликлар учун бевосита Франция расмийлари жавобгар. Бу ҳақда Канака Миллий озодлик фронти — FLNKS етакчиларидан бири Жимми Науна маълум қилди.
Муаллиф The Guardian нашрида чоп этган мақоласида оролдаги тартибсизлик Франция президенти Эммануэль Макроннинг мазкур ҳудуддаги ўз тақдирини ўзи белгилаш жараёнини издан чиқаришга қаратилган сиёсий манёврларининг бевосита натижаси эканини таъкидлаган.
Икки ҳафта аввал Нумеа пойтахтида бошланган тартибсизликларга Франция Миллий ассамблеясида тақдим этилган сайлов ислоҳоти тўғрисидаги қонун лойиҳаси сабаб бўлди, — дейди сиёсий етакчи.
FLNKS ҳаракати ва унинг иттифоқчилари сайлов ислоҳоти тўғрисидаги қонун лойиҳаси апрель ойида Макрон ҳукумати томонидан Сенатга киритилганидан бери унга қарши чиқмоқда.
Ҳукумат архипелаг туб аҳолисининг норозилигига ва бу ерда тартибсизликларни келтириб чиқариши мумкин бўлган аниқ белгиларга қарамай, қонун лойиҳасини илгари суришга муваффақ бўлган.
Бу унинг шахсий сиёсий манфаатлари учун қилинган пиар бўлди. Ҳатто ўз партияси ичида ҳам Макрон қўллаб-қувватловини йўқотган. Унинг Янги Каледониядаги вазиятни бошқариши сиёсий гуруҳлар томонидан миллий миқёсда мунозара қилинмоқда, — дея муаллиф Макроннинг аввалроқ Янги Каледонияга ташрифини изоҳлаган.
Маълум бўлишича, Макрон Парижга қайтиб, сайлов ислоҳотини миллий референдумга қўйиш масаласини кўриб чиққан.
Эслатиб ўтамиз, аввалроқ Макрон фуқаровий тартибсизликлар ва зўравонликлар кучайиши ортидан Янги Каледонияга ташриф буюрган эди. Тартибсизликлар вақтида Нумеа кўчаларида блокадалар ўрнатилган. Автомобиллар ва корхоналарга ўт қўйилган. Дўконлар талон-торож қилинган.
Таҳлилчилар Янги Каледония оролида тартибсизликлар юзага келишига бош омил сифатида Париж томонидан оролда сайлов қонунчилигини ўзгартириш тўғрисида қарор чиқарилишини келтирган. Парижнинг тутган йўлидан норози оломон Нумеа кўчаларида ғалаёнлар уюштирган.
Изоҳ (0)