Франция биринчи хоними Брижит Макрон нафақат сиёсий доираларда, балки ўзига хос гўзаллик ва услуб рамзи сифатида ҳам бутун дунё эътиборида. 70 ёшдан ошганига қарамай, у ҳали ҳам замонавий кўриниши, тетиклиги ва ўзига бўлган ишончи билан барчада ҳайрат уйғотади. Ундан илҳомланаётган минглаб аёлларни бир савол қизиқтиради: “Хонимнинг гўзаллик ва саломатлик сирлари нимада?”
Соч турмаги
Узун боб услубидаги, кумуш рангдан сарғиш тусгача товланувчи сочлари фен билан қуритилиб, ортиқча шакл бермасдан ҳажм берилгандек кўринади. Бундай табиий ва тўлқинсимон сочлар француз аёлларига хос жозибани ифодалайди. Қалин чўлка (пешонага тушган сочлар) эса Брижит Макронни янада ёш кўрсатади.
Офтобда тобланган тери туси
Брижит ҳар доим гўёки денгиз соҳилларида ўтган таътилдан қайтгандек кўринади: унинг юзи офтобда енгил тобланганга ўхшайди. Бундай румянадан фойдаланиш терига соғлом ва дам олгандек кўриниш беради.
Макияж
Ёрқин ва тўқ рангли лаб бўёқлари Макрон хоним учун ёт косметика. У лаблар учун табиий, оч ранглар ва ярим шаффоф текстураларни танлайди. Бундай макияж одатда ёшроқ авлод аёлларига хос услуб. Шунингдек, у асосий эътиборни кўзларга қаратади ва қалам, тушни аямайди. Брижит анча вақтдан бери ташқи кўринишида ҳеч қандай тажриба ўтказмайди ва йиллар давомида бир хил образга амал қилади.
Табассум
Брижит Макронни расмий суратларда жиддий ёки кайфиятсиз ҳолда учратиш қийин. У деярли ҳар доим камералар олдида ёрқин табассум билан порлайди. Бу ўзига ишонч рамзи бўлиб, аёллик латофатига янада жозиба бағишлайди.
Овқатланиш тартиби
Биринчи хонимнинг бўйи 164 сантиметр, вазни эса атиги 45 килограмм. У 34 ўлчамдаги либосларни кияди. Бу кўрсаткичлар ортида катта меҳнат ётади. Брижит нафақат ўзининг, балки турмуш ўртоғи Эммануэл Макроннинг ҳам рационини қаттиқ назорат қилади.
Елисей саройининг бош ошпази Гиём Гомес шундай деган:
“Брижит ҳар куни унга ўн хил мева ва сабзавотдан иборат таомлар тайёрланишини сўраган. У гўштдан кўра балиқ истеъмол қилишни афзал кўради. Ягона истисно — вақти-вақти билан ичиладиган бир бокал оқ винодир. Шунингдек, у Париждаги La Rotonde ресторанида денгиз маҳсулотлари ассортисини танлайди, Les Sports кафесида эса крабли таомларни буюртма қилади”.
Ширинликлар ва зарарли маҳсулотлар эса мутлақо тақиқланган. Макроннинг сайлов кампанияси ҳақида суратга олинган ҳужжатли фильмда шундай кадрлар бор: Эммануэл расмий учрашувдан сўнг чарчагани учун шоколад сўрайди, Брижит эса унинг собиқ ўқитувчиси сифатида эътироз билдиради:
“Мен бундай жирканч нарсаларни ейишингни истамайман”, дейди.
Шунда Макрон: “Хўп, унда менга сув бер”, дея рози бўлади.
Спорт
Спорт машқлари биринчи хонимнинг кундалик режимига киритилган. У ҳар тонгда бир соат велотренажёрда вақт ўтказади. Баъзида қўриқчилар ҳамроҳлигида Сена бўйлаб ёки Елисей саройи боғларида бир неча километр югуради.
Изоҳ (0)