Франция президенти Эммануэл Макрон бош вазир Франсуа Байру билан учрашувда мамлакатнинг янги ҳукумати таркибини тасдиқлади, бунда асосий лавозимлар аввалги вазирлар маҳкамаси аъзоларида сақланиб қолди.
Бу ҳақда BFМTV телеканали хабар бермоқда.
Рўйхатни Елисей саройи бош котиби Алексис Колер ўқиб эшиттирди.
Сентябрь ойида ТИВга келган Жан-Ноэл Барро лавозимида қоладиган бўлди, Себастьян Лекорну эса мамлакат Қуролли кучлари вазирлиги раҳбари бўлишда давом этади. Шунингдек, Бруно Ретаё Ички ишлар вазирлигини бошқариши бўйича қарор қабул қилинди.
Телеканал таъкидлаганидек, янги бош вазир Франсуа Байру ИИВ раҳбари сифатида Ретаёни қолдиришга қарор қилган бўлса-да, ташқи ишлар ва мудофаа вазирини алмаштирмоқчи бўлган.
Бироқ, дипломатия ва мудофаа - бу президент анъанавий тарзда вазирларни танлайдиган иккита соҳа бўлиб, Макрон уларни жойида қолдиришга қарор қилган.
5 декабрь куни Франция президенти ишончсизлик вотуми туфайли ҳукумат истеъфосини қабул қилганди.
Мамлакат бош вазири Мишел Барне кабинетига ишончсизлик вотуми 4 декабрь куни қабул қилинган эди. Ишончсизлик вотумига 2025 йилги бюджетни мувофиқлаштириш жараёнида мамлакат сиёсий кучлари ўртасидаги келишмовчиликлар сабаб бўлган.
Барне кабинети сентябрь ойининг иккинчи ярмида тузилган эди. Миллий ассамблеяга ўтказилган сайловлардан сўнг, Макронга янги ҳукумат раҳбарини тайинлаш учун деярли уч ой вақт керак бўлди. Сайлов натижаларига кўра, бирорта ҳам партия парламентда кўпчилик ўринни қўлга кирита олмаган эди.
Изоҳ (0)