Президент Шавкат Мирзиёевнинг Францияга тарихий давлат ташрифининг тадбирларга бой дастури якунига етди. Бу ҳақда Президент матбуот хизмати хабар берди.
Давлат раҳбари Париж шаҳрида Франция президенти Эммануэл Макрон билан самарали музокаралар ўтказди.
Саммит якунида Стратегик шериклик муносабатларини ўрнатиш тўғрисида қўшма декларация, шунингдек, ҳамкорликнинг турли йўналишлари бўйича битимларнинг салмоқли тўплами қабул қилинди.
Президент Франциянинг етакчи компания, банк ва ташкилотлари раҳбарлари билан давра суҳбатида иштирок этди. Умумий қиймати 6,5 миллиард евро бўлган аниқ кооперация лойиҳаларини амалга оширишни назарда тутувчи Инвестиция ва инновация соҳаларида ҳамкорлик дастури қабул қилинди.
Икки томонлама ҳамкорликни ривожлантиришга қўшган салмоқли ҳиссаси учун Ўзбекистон президенти Франциянинг олий мукофоти - Фахрий легион ордени билан тақдирланди.
Ташриф доирасида Франция Миллий мажлиси Раиси Яел Браун-Пиве ва Париж шаҳри мери Анн Идалго билан учрашувлар ўтказилди. Париж шаҳри кўчаларидан бирига Самарқанд номини беришга бағишланган маросим бўлди.
ЮНЕСКО Бош директори Одри Азуле билан музокараларда ҳамкорликни янада ривожлантириш истиқболлари ҳамда ташкилот Бош конференциясининг Самарқанд шаҳридаги 43-сессиясига тайёргарлик кўриш масалалари муҳокама қилинди.
Ташриф тадбирлари якунлангач, “Орли” халқаро аэропортида давлат раҳбарини Франция спорт ва ёшлар вазири Мари Барсак ва бошқа расмий шахслар кузатиб қўйди.
Давлат раҳбари Тошкентга жўнаб кетди.
Изоҳ (0)