10 апрель, якшанба куни Францияда президентлик сайловларининг биринчи босқичи бўлиб ўтмоқда. Давлат раҳбари лавозими учун 12 нафар номзод курашмоқда. Сайловнинг асосий фаворитлари – мамлакатнинг амалдаги етакчиси Эммануэль Макрон ва «Миллий ралли» партияси раҳбари Марин Ле Пен хоним.
Сўнгги сўровларга кўра, Макрон ва Ле Пен иккинчи турга чиқиш учун энг яхши имкониятга эга, бироқ сайловчиларнинг фаоллиги овоз бериш натижаларига сезиларли таъсир кўрсатиши мумкин. Сиёсатшуносларнинг прогнозларига кўра, фаоллик рекорд даражада паст бўлиши мумкин.
Французлар давлат раҳбарини беш йиллик муддатга сайлаши керак. Агар биринчи турда номзодларнинг ҳеч бири мутлақ кўпчиликни (50 фоиздан кўп овоз) ололмаса, иккинчи тур ўтказилади. Бешинчи Франция Республикаси тарихида бирорта ҳам президентлик сайлови биринчи тур билан якунланмаган.
Сайловчилар рўйхатида 48,7 миллион француз бор. Якшанба куни бутун Франция бўйлаб 70 мингга яқин сайлов участкалари ишлайди. Улар 8:00 (Тошкент вақти билан 11:00) да очилади. Кўпгина француз коммуналарида 19.00 (Тошкент вақти билан 22:00) гача овоз бериш мумкин бўлади. Катта шаҳарларда, жумладан Париж, Лион, Марсель, Ница, Бордо, Тулуза ва бошқаларда сайлов участкалари соат 20:00 (Тошкент вақти билан 23:00)гача ишлайди.
Франциянинг бошқа вақт зоналарида жойлашган хорижий департаментларида овоз бериш 9 апрелдан бошланган.
Якшанба куни сайлов участкалари ёпилгач, эхит полл маълумотлари эълон қилинади. Кейин биринчи босқичнинг дастлабки натижалари Франция Ички ишлар вазирлиги сайтида эълон қилинади. Кун давомида эса вазирлик одатда сайловчиларнинг иштироки ҳақидаги маълумотларни бериб боради.
13 апрель, чоршанба куни Франция Конституциявий кенгаши 24 апрелга белгиланган сайловнинг биринчи босқичи натижаларини ва иккинчи турга ўтадиган икки номзодни тасдиқлаши керак.
Шунингдек, 10 апрель куни қисман тан олинган Жанубий Осетия Республикасида ҳам президентлик сайловлари бўлиб ўтмоқда. Республика Марказий сайлов комиссияси маълумотларига кўра, овоз бериш мамлакатдаги 72 та сайлов участкасида бўлиб ўтади, Россия, Абхазия ва Шимолий Осетия пойтахтларида яна тўртта сайлов участкалари очилади. «Жами 32 мингдан ортиқ сайловчи рўйхатга олинди», — дейилади МСК хабарида.
Президентлик сайловларини маҳаллий журналистлардан ташқари Россия оммавий ахборот воситаларининг 20 га яқин вакили ёритади. Жараённи кузатиш учун Жанубий Осетияга 40 дан ортиқ халқаро кузатувчилар – Россия, Донбасс Республикалари, Абхазия, Австрия, Венесуэла, Германия, Тоғли Қорабоғ, Никарагуа, Финляндия ва бошқалардан делегациялар келади.
Республиканинг олий давлат лавозими учун беш номзод — амалдаги давлат раҳбари Анатолий Бибилов, парламент спикери ўринбосари Александр Плиэв, «Нихас» сиёсий партияси раҳбари Алан Гаглоэв, депутат Гарри Мулдаров ва собиқ депутат Дмитрий Тасоев курашмоқда.
Республика раҳбари беш йил муддатга сайланади. Бир шахс бу лавозимни кетма-кет икки муддатдан ортиқ эгаллаши мумкин эмас.
Амалдаги президент Анатолий Бибилов ушбу лавозимга 2017 йилнинг апрель ойида сайланган эди. 30 март куни Бибилов Жанубий Осетия Россияга қўшилишни режалаштираётгани ҳақида маълум қилган.
«Россия билан бирлашиш бизнинг стратегик мақсадимиз, деб ҳисоблайман. Бизнинг йўл. Одамларнинг интилишлари. Ва биз бу йўлдан борамиз. Яқин кунларда тегишли қонуний чоралар кўрамиз. Жанубий Осетия Республикаси ўзининг тарихий ватани – Россиянинг бир қисми бўлади», — деди Бибилов.
Унинг матбуот хизмати Жанубий Осетиянинг Россия таркибига кириши бўйича барча қонуний тартиб-қоидалар президентлик сайловларидан сўнг якунланишини маълум қилган.
Изоҳ (0)