Макрон парламентни тарқатди ва муддатидан олдин сайлов ўтказилишини айтди

Эммануэл Макрон Франция парламентини тарқатиб юборди. Бу ҳақда CNN нашри хабар берди.

Манбада айтилишича, якшанба куни бўлиб ўтган Европа парламентига сайловларда президент Макроннинг “Ренессанс” партияси ўта ўнгчи мухолифатга ўз ўрнини бой берган. Бунинг ортидан эса президент навбатдан ташқари сайловлар ўтказилишини эълон қилган.

Дастлабки маълумотларга кўра, ўта ўнгчи “Миллий бирлик” партияси 31,5 фоиз овоз билан биринчи ўринга чиққан. Президентнинг “Ренессанс” партияси эса 15,2 фоиз овоз билан иккинчи ўринни эгаллаган. Франция социалистлари партияси 14,3 фоиз овоз билан учинчи ўринда қайд этилган.

Якунловчи сайлов натижалари эълон қилингач, “Миллий бирлик” раҳбари Жордан Барделла президент Макронни Франция парламентини тарқатиб юборишга чақирган. Ҳукмрон ва унга мухолиф партия орасидаги тафовут ўзгариши президент учун “жиддий муаммо” яратганини маълум қилган.

“Ҳозирги ҳукуматнинг мисли кўрилмаган мағлубияти бир давринг тугашини ва Макрондан кейинги даврнинг илк куни бошланганини англатади”, — деган Барделла.

Эммануэл Макрон Франция қуйи палатасини тарқатиб юборишини расман эълон қилган. Палатага сайловларнинг биринчи тури 30 июнь куни, кейингиси эса 7 июлда бўлиб ўтиши маълум қилинган.

Франция тизимига кўра, парламент сайловлари қуйи палатанинг 577 нафар аъзосини — Миллий ассамблеяни сайлаш учун ўтказилади. Мамлакат президентини танлаш учун эса алоҳида сайловлар тизими мавжуд.

2022 йилда бўлиб ўтган парламент сайловларининг сўнгги босқичида Макроннинг “Ренессанс” партияси кўпчилик овоз тўплай олмай, коалиция тузишга мажбур бўлган эди.

“Биз мамлакатни қайта тиклашга тайёрмиз, французлар манфаатларини ҳимоя қилишга, оммавий иммиграцияга чек қўйишга, французларнинг харид қобилиятини кўтаришга, мамлакатни қайта саноатлаштиришни бошлашга тайёрмиз”, — деган “Миллий бирлик” ғалабаси ҳақида муносабат билдирган партиянинг парламентдаги етакчиси Марин Ле Пен.

Сўнгги марта Франция президенти парламентни 1997 йилда тарқатиб юборган эди. Бунинг оқибатида эса президент Жак Ширак партияси парламентда кўпчилик ўрнидан маҳрум бўлган. Лионель Жоспин бошчилигидаги социалистлар эса ҳокимиятга келган.