Emmanuel Makron Fransiya parlamentini tarqatib yubordi. Bu haqda CNN nashri xabar berdi.
Manbada aytilishicha, yakshanba kuni bo‘lib o‘tgan Yevropa parlamentiga saylovlarda prezident Makronning “Renessans” partiyasi o‘ta o‘ngchi muxolifatga o‘z o‘rnini boy bergan. Buning ortidan esa prezident navbatdan tashqari saylovlar o‘tkazilishini eʼlon qilgan.
Dastlabki maʼlumotlarga ko‘ra, o‘ta o‘ngchi “Milliy birlik” partiyasi 31,5 foiz ovoz bilan birinchi o‘ringa chiqqan. Prezidentning “Renessans” partiyasi esa 15,2 foiz ovoz bilan ikkinchi o‘rinni egallagan. Fransiya sotsialistlari partiyasi 14,3 foiz ovoz bilan uchinchi o‘rinda qayd etilgan.
Yakunlovchi saylov natijalari eʼlon qilingach, “Milliy birlik” rahbari Jordan Bardella prezident Makronni Fransiya parlamentini tarqatib yuborishga chaqirgan. Hukmron va unga muxolif partiya orasidagi tafovut o‘zgarishi prezident uchun “jiddiy muammo” yaratganini maʼlum qilgan.
“Hozirgi hukumatning misli ko‘rilmagan mag‘lubiyati bir davring tugashini va Makrondan keyingi davrning ilk kuni boshlanganini anglatadi”, — degan Bardella.
Emmanuel Makron Fransiya quyi palatasini tarqatib yuborishini rasman eʼlon qilgan. Palataga saylovlarning birinchi turi 30-iyun kuni, keyingisi esa 7-iyulda bo‘lib o‘tishi maʼlum qilingan.
Fransiya tizimiga ko‘ra, parlament saylovlari quyi palataning 577 nafar aʼzosini — Milliy assambleyani saylash uchun o‘tkaziladi. Mamlakat prezidentini tanlash uchun esa alohida saylovlar tizimi mavjud.
2022-yilda bo‘lib o‘tgan parlament saylovlarining so‘nggi bosqichida Makronning “Renessans” partiyasi ko‘pchilik ovoz to‘play olmay, koalitsiya tuzishga majbur bo‘lgan edi.
“Biz mamlakatni qayta tiklashga tayyormiz, fransuzlar manfaatlarini himoya qilishga, ommaviy immigratsiyaga chek qo‘yishga, fransuzlarning xarid qobiliyatini ko‘tarishga, mamlakatni qayta sanoatlashtirishni boshlashga tayyormiz”, — degan “Milliy birlik” g‘alabasi haqida munosabat bildirgan partiyaning parlamentdagi yetakchisi Marin Le Pen.
So‘nggi marta Fransiya prezidenti parlamentni 1997-yilda tarqatib yuborgan edi. Buning oqibatida esa prezident Jak Shirak partiyasi parlamentda ko‘pchilik o‘rnidan mahrum bo‘lgan. Lionel Jospin boshchiligidagi sotsialistlar esa hokimiyatga kelgan.
Izoh (0)