Франция президенти Эммануэль Макроннинг «Биргаликда!» коалицияси мамлакат парламентининг қуйи палатаси — Миллий мажлисга бўлиб ўтган сайловларнинг иккинчи босқичида ғолиб бўлди, бироқ мутлақ кўпчилик ўринни қўлга кирита олмади. У 577 та ўриндан 245 тасини эгаллади, кўпчилик ўринга эга бўлиш учун унга 40 дан ортиқ жой етмай қолди, деб ёзади «РБК».
Мамлакат Ички ишлар вазирлиги сайловнинг якуний натижаларини эълон қилди:
- Макроннинг «Биргаликда!» коалицияси — 245 та ўрин;
- Жан-Люк Меланшоннинг «Янги халқ экологик ва ижтимоий иттифоқи» (Nupes) — 131 та ўрин;
- Марин Ле Пеннинг «Миллий бирлашув»и — 89 та ўрин;
- Республикачилар ва уларнинг иттифоқдошлари — 61 та ўрин;
- Қолганлар — 51 та ўрин.
Шунга қарамай, у овоз бериш натижаларини ҳурмат қилиш ва «хулосалар чиқариш» зарурлигини айтди. Борн сиёсий кучларни бирлашишга ҳамда «Францияда барқарорликни кафолатлаш ва зарур ислоҳотларни ўтказиш» устида ишлашга чақирди.
Ислоҳотлар ўтказиш учун Макрон ўз коалициясидан ташқаридаги депутатлардан кўмак олишига тўғри келади, бироқ баъзи партиялар аллақачон давлат раҳбарига ёрдам беришни истамаслигини билдирган. Масалан, республикачилар вакиллари Макронга нисбатан мухолифат йўналишида муносабатни сақлаб қолишини эълон қилди.
Парламент сайловларининг биринчи босқичида Макроннинг коалицияси кичик фарқ билан олдинга чиқиб олишга муваффақ бўлганди: у овозларнинг 25,7 фоизини, Меланшоннинг Nupes’и — 25,64 фоизини, Ле Пеннинг «Миллий бирлашуви» эса 18,72 фоизини қўлга киритганди.
Парламент сайловлари мажоритар сайлов тизими бўйича ўтказилади. Биринчи турдаёқ сайланиш учун номзод сайловчиларнинг мутлақ кўпчилик овозини олиши керак. Агар ҳеч ким бундай натижа қайд этмаса, иккинчи тур ўтказилади, унда биринчи турда камида 12,5 фоиз овоз олган барча номзодлар қатнашади.
Миллий мажлис Франция парламентининг қуйи палатаси ҳисобланади. У умумий сайловда сайланган 577 нафар депутатдан иборат бўлиб, беш йил ваколат муддатига эга бўлади.
Изоҳ (0)