Франция президенти Эммануэл Макрон республика парламентининг ишончсизлик вотумидан сўнг ҳукумат истеъфосини қабул қилди. Бу ҳақда Елисей саройи хабар берди.
Мамлакат бош вазири Мишел Барне кабинетига ишончсизлик вотуми 4 декабрь куни қабул қилинган эди. Ишончсизлик вотумига 2025 йилги бюджетни мувофиқлаштириш жараёнида мамлакат сиёсий кучлари ўртасидаги келишмовчиликлар сабаб бўлган.
“Мишел Барне ҳукумат аъзолари билан биргаликда янги ҳукумат тайинлангунга қадар жорий масалалар ҳал этилишини таъминлайди”, дейилади хабарда.
Барне кабинети сентябрь ойининг иккинчи ярмида тузилган эди. Миллий ассамблеяга ўтказилган сайловлардан сўнг, Макронга янги ҳукумат раҳбарини тайинлаш учун деярли уч ой вақт керак бўлди. Сайлов натижаларига кўра, бирорта ҳам партия парламентда кўпчилик ўринни қўлга кирита олмаган эди.
Бешинчи Республика конституциясига кўра, президент июль ойида бўлиб ўтган сўнгги сайловлардан бир йил ўтиб янги парламент сайловларини тайинлаши мумкин. Бу 1962 йилда Франциянинг 19-президенти Жорж Помпиду ҳукумати истеъфога чиқарилганидан кейинги иккинчи бундай ҳолат.
Euronews нашри аввалроқ Франция Миллий ассамблеяси бош вазир раҳбарлигидаги ҳукуматга ишончсизлик вотуми учун овоз бергани ҳақида хабар қилганди. Резолюцияни 557 нафар депутатдан 331 нафари қўллаб-қувватлаган.
Ишончсизлик вотуми масаласини дастлаб “Янги халқ фронти” сўл коалицияси кўтарди, сўнгра бюджет лойиҳаси бўйича келишмовчиликлар туфайли ўта ўнг “Миллий бирлашма” ўз ташаббуси билан чиқди.
Мишел Барне ўз нутқида ҳукуматига ишончсизлик билдирилиши “жиддий оқибатларга” олиб келишини таъкидлади. Бош вазир французларнинг “харид қобилияти пасайиши” ва “янги полициячилар ҳамда ҳарбийларни ёллаш имконияти йўқолиши” ҳақида гапирди.
Изоҳ (0)