Қозоғистонда саноатда фойдаланиш учун техник каннабис етиштиришни қонунийлаштириш режалаштирилмоқда. Бу ҳақда мамлакат ички ишлар вазири ўринбосари Санжар Адиловга таяниб Ulysmedia хабар берди.
Янгилик фақат таркибида юқори миқдорда гиёҳванд моддалар бўлмаган техник каннабисга тааллуқли. У қонунчилик даражасида қатъий тартибга солинади.
Таклиф этилаётган ўзгаришларга кўра, саноат миқёсида етиштириш учун каноп (каннабис) таркибидаги асосий психофаол компонент — тетрагидроканнабинол (ТГК) миқдори учун чегара белдиланади. Кўриб чиқилаётган диапазон — 0,1 дан 0,3 фоизгача.
Адиловнинг таъкидлашича, бундай миқдор гиёҳвандлик таъсирини келтириб чиқармайди, шу сабабли ноқонуний муомала учун қизиқиш уйғотмайди.
Гап фақат саноатда қайта ишлашга мўлжалланган техник каннабис ҳақида бормоқда. Ҳозирнинг ўзидаёқ қонунчилик ТГКни нол миқдорда етиштиришга рухсат беради. Наркобизнесга қарши курашиш қўмитаси тўртта лицензия берган, улардан бири Қўстанай вилоятида амалга оширилмоқда. У ерда таркибида ТГК бўлмаган саноат каннабисини етиштириш ва қайта ишлаш бўйича ишлар олиб борилмоқда, деди вазир ўринбосари.
Шунингдек, у экиш ва култивациядан тортиб қайта ишлаш ва тайёр маҳсулотни ишлаб чиқаришгача бўлган бутун занжир Наркотик жиноятчиликка қарши курашиш қўмитаси томонидан қаттиқ назорат остида бўлишини айтди.
Ўзбекистонда техник каноп етиштиришга рухсат берилган
Маълумот ўрнида, Ўзбекистонда саноатбоп техник каноп ўсимлигини етиштиришга рухсат берилган. Унинг таркибида тетрагидроканнабинол гиёҳвандлик моддасининг миқдори 0,2 фоизгача бўлиши керак. 2022 йилда етиштирилган ҳосил 1,2 метр баландликни ташкил этган, 2023 йилда эса узунлиги 3,5 метрга етган.
Техник каноп ўсимлигининг ўзига хос хусусиятларидан бири унинг 100 фоиз қайта ишланишида бўлиб, бир қатор хорижий давлатларда, хусусан, Франция, Испания, Италия, Украина ва Россияда ушбу ўсимликнинг кўплаб навлари (шу жумладан, Ўзбекистонда экилаётган “Родник” нави ҳам) яратилган ва Давлат селексия ютуқлари реестрига киритилган ҳамда уларни қишлоқ хўжалиги экинлари сифатида экиб етиштиришга рухсат берилган.
Изоҳ (0)