Францияда якшанба куни мамлакат парламенти — Миллий ассамблеяга сайловларнинг иккинчи босқичи бўлиб ўтади, дея хабар бермоқда Франция ОАВлари.
Эксперт ва оммавий ахборот воситаларининг эътибори амалдаги президент Эммануэль Макрон коалицияси Франция парламентининг қуйи палатасида кўпчиликни сақлаб қола оладими деган саволга қаратилган.
Бир ҳафта олдинги биринчи босқичда Макроннинг «Биргаликда» коалицияси сўл ҳаракат етакчиси Жан-Люк Меленшон бошчилигидаги Янги халқ экологик ва ижтимоий иттифоқи (Nupes) билан деярли бир хил натижа қайд этди.
577 депутатдан иборат Миллий ассамблеяда кўпчиликни ташкил қилиш учун камида партияларга 289 ўрин керак бўлади.
Мутахассислар ва оммавий ахборот воситаларининг фикрича, «макронист»лар иккинчи босқичда ҳам ғалаба қозониш учун имкониятини сақлаб қолади, аммо кўпчилик рекорд даражада паст сайловчилар иштирокида ўтказилган биринчи турдаги кичик фарқни ҳисобга олган ҳолда бу натижа ҳақида баъзи ноаниқлик борлигини айтмоқда.
BFMTV телеканали ва L’Express журнали буюртмаси билан Elabe тадқиқот ва консалтинг маркази томонидан ўтказилган сўров натижаларига кўра, президент коалицияси бу сафар Миллий ассамблеяда мутлақ кўпчиликни ташкил қилмаслиги мумкин.
Парламент сайловлари мажоритар сайлов тизими бўйича ўтказилади. Биринчи турдаёқ сайланиш учун номзод сайловчиларнинг мутлақ кўпчилик овозини олиши керак. Агар ҳеч ким бундай натижа қайд этмаса, иккинчи тур ўтказилади, унда биринчи турда камида 12,5 фоиз овоз олган барча номзодлар қатнашади.
Миллий ассамблея Франция парламентининг қуйи палатаси ҳисобланади. У умумий сайловда сайланган 577 нафар депутатдан иборат бўлиб, беш йил ваколат муддатига эга бўлади.
Изоҳ (0)