Эрон 19 июнь куни тонгда Исроилга 20 та ракета учирди, ҳужум оқибатида 40 га яқин исроиллик тан жароҳати олди. Бу ҳақда Times of Israel хабар берди.
Маълум қилинишича, ҳаво ҳужумидан огоҳлантирувчи тревога Исроил бўйлаб янграган. Эроннинг баллистик ракеталаридан бири Исроил жанубидаги Беар Шева шаҳридаги Сорока касалхонасига зарба берган. Маҳаллий нашрлар ва оммавий ахборот воситалари бино шикастланганини кўрсатувчи шифохонадан олинган видеоларни эълон қилмоқда. Зарарнинг аниқ кўлами, қурбонлар ва жароҳатланганлар ҳақида расмий маълумот мавжуд эмас.
Эроннинг сўнгги ҳужумидан сўнг Исроилнинг марказий ва жанубий қисмларида камида тўртта ракета қулаган жойлар аниқланган. Тель Авив, Рамат Гана, Холон шаҳарларидаги биноларга зарбалар берилгани айтилмоқда. Ynet хабарига кўра, Холонда уч киши, Рамат Ганада эса 12 киши жароҳатланган. Исроил фонд биржасининг Тель Авив шарқида жойлашган биноси ҳам нишонга олинган.
Исроил мудофаа армияси ҳужумдан олдин Эрондан ракеталар учирилганини қайд этиб, мамлакатнинг барча аҳолисига ҳимояланган биноларда бўлишни буюрган эди. Исроил ҳарбий цензурасининг янги талабларига кўра, ракета қулаган жойдан кадрлар эълон қилиш ва ҳаво мудофааси ишини видеога олиш тақиқланади.
Эрон оммавий ахборот воситаларининг ёзишича, Эрон Исроилга қарши “Ҳақиқий ваъда 3” операцияси доирасида ҳужумларнинг янги тўлқинини бошлаган.
Изоҳ (0)