Россия Украинанинг стратегик шаҳри бўлган Покровск яқинида 110 минг аскар тўплади. Бу ҳақда Украина расмийлари 27 июнь куни хабар берди.
Покровск шаҳри 1200 километрлик фронт чизиғи бўйлаб “энг муҳим нуқта” ҳисобланади. Россия қўшинлари қарийб бир йилдан бери бу ҳудудни эгаллашга ҳаракат қилиб, бир неча бора ҳужумлар уюштирган. Аммо Москва қўшин сони ва мавжуд қурол-яроғлар бўйича аниқ устунликка эга бўлишига қарамай, шаҳарни эгаллай олмаган.
Покровск - Москва учун стратегик нишон саналади. Россия президенти Владимир Путин ўз мақсади Украинанинг шарқий қисмидаги Донецк ва Луганск вилоятларининг барчасини эгаллаб олиш эканини маълум қилган. Киев ва унинг иттифоқчилари Путинни рус ҳарбийлари Украина ҳудудини янада кенгроқ эгаллаб олиши учун тинчликни бузишда айбламоқда.
Йирик шаҳар бўлмаса-да, Покровск асосий таъминот ва темир йўлда жойлашган. Шаҳар Костиантинивка, Краматорск ва Словянск билан биргаликда Донецк вилоятининг ҳали ҳам Киев назорати остида ҳудуди ҳисобланади. У Украина мудофаасининг асосини ташкил қилади.
Урушдан олдин Покровскда 60 мингга яқин киши яшаган. Аҳолининг аксарияти Россия 2022 йил февралда Украинага кенг кўламли босқин бошлаганидан бери шаҳарни тарк этган. Украинанинг сўнгги ишлаётган коксли кўмир кони Покровскда жойлашган. Коннинг кўплаб ходимлари уни сақлаб қолиш учун ҳудудда қолганди. Аммо 2025 йили кон ёпилгач, ходимлар ҳам ҳудудни тарк этган.
Америка урушни ўрганиш институтининг маълум қилишича, 2024 йил охирида Россия Покровскни эгаллаш учун ўзининг асл ҳарбий режасидан воз кечган. Ўша пайтда Украина қўшинлари дронлардан фойдаланишни бошлагани эди. Бу эса Россияни шаҳарни эгаллашни янада тезлатишга мажбур қилган.
Москва Покровскдаги қўшинлар сонини сезиларли даражада ошира олмаган. Чунки Украина қўшинлари руслар назорати остидаги жанубий Курск вилоятига бостириб кирган эди. Ушбу Курск операцияси 63 мингга яқин россиялик ва 7 мингга яқин шимолий кореялик ҳарбийларни ҳалок қилган.
Изоҳ (0)