Америка Қўшма Штатларининг биринчи хоними Мелания Трамп собиқ президент Жо Байденнинг ўғли Хантер Байденга миллиард доллардан ортиқ маблағ талаб қилувчи суд даъвоси очиш билан таҳдид қилди. Бу ҳақда Fox News телеканали хабар берди.
Манбага кўра, Хантер Байден август ойининг бошида журналист Эндрю Каллаханга интервью берган. Хантер суҳбат давомида молиячи Жеффри Эпштейнга оид, ҳали эълон қилинмаган ҳужжатлар АҚШ президенти Дональд Трампнинг қилмишларини фош қилишини айтган.
“Эпштейн Меланияни Трамп билан таништирган. Уларнинг алоқалари шу қадар кенг ва чуқур”, деган собиқ президентнинг ўғли.
Биринчи хонимнинг манфаатларини ҳимоя қилаётган адвокат Алекандро Брито Хантер Байденни “ёлғон, обрўсизлантирувчи ва ҳурматсиз” баёнотларидан воз кечишга чақирган.
“Бу талаб бажарилмаса, Мелания Трамп сиз унга етказган улкан молиявий ва обрў йўқотиш зарарини қоплаш учун ўзида мавжуд барча қонуний ҳуқуқ ва воситалардан фойдаланишдан бошқа чораси қолмайди”, деган адвокат.
Алекандро Бритонинг қайд этишича, Байденнинг иддаоларини кўплаб ОАВ ва миллионлаб обуначиларга эга ижтимоий тармоқ фойдаланувчилари тарқатган.
Мелания Трамп вакилларининг баёнотида айтилишича, Байденнинг иддаолари Трампнинг танқидий биографиясини ёзган журналист Майкл Вулфнинг сўзларига асосланган. Вулф The Daily Beast нашрига берган интервьюсида Мелания, Эпштейн ва Трамп билан алоқадор бўлган бир киши билан таниш бўлганини айтган. Воқеа Меланиянинг Дональд Трамп билан танишган даврига тўғри келади. Кейинчалик The Daily Beast ушбу материални ўчириб ташлаган.
Мелания Трамп 2005 йилда Дональд Трампга турмушга чиққан. Harper’s Bazaar нашрининг 2016 йил январда ёзганларига таянилса, Мелания Трамп билан 1998 йил ноябрь ойида модел агентликларидан бирининг эгаси уюштирган кечада танишган.
Таъкидланишича, Дональд Трамп чиндан ҳам Эпштейн билан таниш бўлган. Бироқ 2000 йилларда молиячи унинг голф-клуби ходимларини ўзига оғдирган. Шундан сўнг, Трамп у билан алоқаларини узганини айтган. Ҳозирча Трамп ва Меланияни Эпштейн таништирганига оид ҳеч қандай далил йўқ.
Молиячи Жеффри Эпштейн одам савдоси ва уларни жинсий эксплуатация қилишда айбланган. Тергов маълумотига кўра, у вояга етмаган қизлардан жинсий хизматлар олиб, уларни таъсир доираси кучли шахсларга бериб турган. Эпштейнга 45 йилгача қамоқ жазоси таҳдид солган. Миллиардер айбини тан олмаган. Молиячини 2019 йил 7 июлда ҳибсга олишган. Бироқ у ҳибсга олинганига бир ой бўлганида Нью Йоркдаги қамоқхонада ўз жонига қасд қилган.
Дональд Трамп бир неча бор Эпштейн мижозлар рўйхатини тузганини ва унда вояга етмаганларни жинсий алоқа учун олган шахслар борлигини айтган. Трамп бу рўйхатда демократлар ҳам бўлиши мумкинлигини билдирган. У президентликка қайтадиган бўлса, рўйхатни эълон қилишга ваъда берган. Кейинчалик Трамп маъмурияти бундай рўйхат мавжуд эмас, деган.
Аввалроқ, АҚШ Адлия вазирлиги ходимлари молиячи Жеффри Эпштейн иши бўйича ҳужжатларни ўрганиб чиқиб, уларда Дональд Трампнинг номи бир неча бор қайд этилганини аниқлагани ҳақида хабар берилганди. Шунингдек, Эпштейн аслида кимлиги ва унинг мижозлари рўйхатида кимлар бўлиши мумкинлиги ҳақида катта таҳлилий мақола ҳам эълон қилинган.
Изоҳ (0)