Россия ҳарбийлари урушда фойдаланаётган FVP дронлари тобора кўпроқ Украинадаги тинч аҳолини нишонга олмоқда. Бу ҳақда БМТнинг Инсон ҳуқуқлари бўйича мониторинг миссияси маълум қилди.
Маълум қилинишича, дронлар Украинадаги тинч аҳоли орасида ўлим ва жароҳатланиш ҳолатларининг асосий сабабларидан бирига айланган. Ҳатто айрим ойларда улар бу борада ракета, артиллерия ва авиация бомбаларидан ҳам кўпроқ талафот етказган.
Мутахассислар юқори аниқликка эга FVP-дронлари билан велосипедда, автомобилда ёки шаҳар автобусида кетаётган тинч аҳоли вакиллари, тез ёрдам машинасидаги беморлар, гуманитар ёрдам етказаётганлар ва одамларни эвакуация қилаётганлар нишонга олинганини таъкидлаган. Ҳатто ўз уйларининг яқинида кўчада юрган ёки сайр қилаётган одамлар ҳам ҳужумга учраган.
Жабрланганларнинг мутлақ кўпчилиги Россиянинг Украина ҳукумати назоратидаги ҳудудларга уюштирган ҳужумлари оқибатида азият чеккан, дейилади БМТ ҳисоботида.
Таъкидланишича, дрон операторлари бундай нишонларни танлаганида халқаро гуманитар ҳуқуқнинг асосий тамойилларини, хусусан, ҳарбийлар ва фуқароларни фарқлаш ҳамда эҳтиёткорлик қоидаларини бузган бўлади.
Баъзи ҳодисалар тинч аҳолига қасддан қилинган ҳужум сифатида баҳоланиши мумкин, бу эса ҳарбий жиноят ҳисобланади. Ҳужумлар ўлим ва жароҳатлардан ташқари шундоқ ҳам оғир бўлган гуманитар вазиятни янада мураккаблаштирмоқда. Чунки тинч аҳоли асосий хизматлар, гуманитар ёрдам ва тиббий хизматлардан фойдалана олмаган.
Изоҳ (0)