Хитойнинг Хебей вилоятида яшовчи Чжан Гуосин ва Ҳай Чао исмли эгизак опа-сингиллар туғилганларидан атиги 10 кун ўтиб турли оилалар томонидан асраб олинган. Қизиғи шундаки, орадан 17 йил ўтиб, улар тақдир тақозоси билан учрашиб қолган ва бир-бирига жуда ўхшашликларини сезган. Улар аввалига яқин дугонага айланган, кейинчалик эса аслида эгизак опа-сингил экани аён бўлган.
Биологик ота-оналари моддий имконият йўқлиги сабабли уларни боқолмасликларини айтиб, фарзандларини асраб олишга берган. Асраб олиш шартларидан бири: иккала оила ҳам Хитойнинг шимолидаги Хебей провинциясида бўлиши керак эди. Шу тариқа, опа-сингиллар бир-бирининг борлигидан бехабар ҳолда алоҳида вояга етди. Фақат 17 ёшга тўлганларида улар ўзаро танишди.
Ҳай мактабда ўқиётган вақтида синфдошидан яқин атрофдаги кийим дўконида ўзига жуда ўхшаш қиз ишлаши ҳақида эшитади ва кўришга қарор қилади. Ҳай дўконга бориб, Чжанни илк бор кўрганида дарҳол ички бир яқинлик ҳис қилади.
Тез орада улар туғилган кунлари айнан бир хил эканини, 100 кунлик чоғларида иккаласи ҳам оғир касалликка чалинганини, овозлари, соч турмаклари ва ҳатто таъби ҳам бир хил эканини билиб олишади.
Улар 14 ой давомида фақат дугона бўлишган. Бу вақт давомида иккала қизни асраб олган оилалар уларнинг эгизак экани ҳақида ҳақиқатни яшириб келган, чунки бу сир очилса, ўгай ота-оналар қизларнинг биологик ота-онасини излаб кетишидан қўрққан.
Ниҳоят, 14 ойдан сўнг ҳақиқат очилади — Чжан ва Ҳай эгизаклар экани тан олинади. Қайси бири катта эканини аниқлаш учун улар “қоғоз-қайчи-тош” ўйинини ўйнайди ва Чжан ютиб чиқади. Кейинроқ ота-оналари аслида у ҳақиқатан ҳам каттаси эканини тасдиқлайди.
Тасодифлар шу билан тугамаган. Опа-сингиллар ҳеч қандай келишувсиз бир-бирига яқин жойлардаги уйларни сотиб олишган. Икковининг ҳам фарзандлари ҳозир 13 ёшда ва ҳаттоки бир синфда ўқийди. Ҳайнинг айтишича, болалари ҳам бир-бирига жуда ўхшайди. Баъзида ота-оналар йиғилишига фақат биттаси боради, ўқитувчилар эса ким кимлигини ажрата олмайди.
Бугунги кунда опа-сингиллар 37 ёшда. Улар биргаликда юритаётган ижтимоий тармоқ саҳифасининг 62 мингдан ортиқ обуначиси бор. Улар яқинда учрашувларининг 20 йиллигини нишонлади. Ҳозирга қадар улар биологик ота-оналарини изламаган.
“Охирги 20 йилнинг ҳар бир куни бахтли ўтди. Сени учратганимдан жуда миннатдорман. Кейинги 20 йилга умид билан қарайлик”, деб ёзади улар саҳифасида.
Изоҳ (0)