YouTube’даги Daryo Lifestyle каналида ўзбек хонандалари ичида биринчи марта Италиянинг энг машҳур “Ла скала” театри билан икки йиллик шартнома имзолаган профессионал хонанда Ақлбек Пиязов билан суҳбат ташкил қилинди. Хонанда акаси сабаб операга меҳри уйғонгани, халқаро танловлардаги иштироки ва машҳур театр билан шартнома имзолаш жараёнлари ҳақида гапирди.
— Бир оиланинг икки вакили операга меҳр қўйишининг сабаби нимада?
— Катта бобом Зийнел Пиязов драматик актёр бўлса-да, овози ниҳоятда жарангдор ва салобатли бўлган. У халқ артисти даражасига эришиб, ҳамиша бош ролларни ижро этган. Дадам ҳам театрнинг хор жамоасида фаолият юритган. Кейинчалик дўмбира билан миллий қўшиқларни ҳам ижро этган. Оиламизда санъаткорлар жуда кўп, аммо акамгача уларнинг ҳеч бири опера йўналишида ижод қилмаган.
Аввалига миллий эстрада хонандаси бўлишни ният қилгандим. Аммо овозимни эшитиб кўрган устозлар айнан акамдек опера йўналишида ижод қилишимни маслаҳат беришди. Кейинчалик бунга ўзим ҳам қизиқиб кетдим. Ҳозир ҳаётимни операсиз тасаввур қилолмайман.
— Опера хонандаси бўлишнинг машаққати нимада?
— Бошқа хонандалар куйлаш жараёнида импровизация қилиши мумкин. Аммо 150 талик оркестр ҳам композитор яратган мусиқий асарни чалади. Опера хонандаси ҳам белгиланган меъёрлардан чиқмаган ҳолда уни ижро этиши керак. Италян тилини билиши, ноталарни мукаммал ўрганиш ва асарни тўлиқ ёдлаган бўлиши керак. Масалан, биргина Жузеппе Вердининг “Риголетто” операсини оладиган бўлсак, унда қанча персонаж иштирок этадиган бўлса, опера хонандаси уларнинг ҳар бирини яхши билиши шарт.
Бундан ташқари, операни ижро этиш хонандадан катта куч ва доимий режимга эътибор беришни талаб этади.
— Кўплаб халқаро танловларда иштирок этгансиз. Уларда иштирокчилар қандай рағбатлантирилади?
— Опера хонандалари ўртасида жуда кўп танловлар ўтказилади. Энг яхши томони, уларнинг кўпчилигида ёш чегараланмайди. Ғолибларга яхшигина гонорар берилгани учун ҳам ҳамиша қизиқиш юқори бўлади. Танловларда иштирок этиб олган энг кўп гонорарим 20 минг АҚШ доллари бўлган. Энг ками эса 5 минг АҚШ доллари. Опера хонандаси йилига иккита танловда ғолиб бўлса ҳам яхшигина даромад топади. Қувонарлиси, бундай танловлар Ўзбекистонда ҳам ташкил этиляпти.
— Алишер Навоий номидаги опера ва балет театрига ишга кирганингизга кўп вақт бўлгани йўқ. Билишимча, у ерга ҳам узоқ вақт стажёр бўлиб ишлаган экансиз.
— Ўзбекистон давлат консерваториясининг бакалавр ва магистратура босқичларини тамомлагандан кейин ҳам ўзимни театрга ишлашга лойиқ деб билмадим. Шу боис Италияда ўқишни давом эттиришга қарор қилдим. Чунки халқаро танловларда иштирок этганимда кўпчилик устозлар менга Италияда ўқишни маслаҳат беришганди. Икки йил давомида таҳсил олдим, аммо осон кечгани йўқ. У пайтда италян тилини яхши билмасдим, бунинг устига оилам ва икки фарзандим бор эди. Аммо сабр билан билимимни мустаҳкамлаб, ўқишни битирдим. Ўзбек опера ва балет театрида куйлашни бошлаганимда кутилмаганда Италиянинг “Ла скала” театри билан икки йиллик шартнома имзоладим. Акам ҳам бу театрда саҳнасида куйлаган, аммо шартнома асосида ишлаш бахти насиб этмаганди. “Ёшим катта бўлиб қолгани учун ишга олишмаганди”, деб афсусланарди. Бу бахт менга насиб этганидан хурсандман, дейди Ақлбек Пиязов.
Опера хонандаси билан бўлган суҳбатни YouTube’даги Daryo Lifestyle каналида томоша қилишингиз мумкин.
Изоҳ (0)