26—30 май кунлари “Халқлар дўстлиги” санъат саройида Жалолиддин Аҳмадалиевнинг “Шундай ўтиб кетмасмиз” номли концерт дастури бўлиб ўтмоқда. “Дарё” жамоаси тўлиқ жонли ижрода ўтаётган концертда қатнашиб, репортаж тайёрлади.

Концертда қизиқчи Жамшидбек Норматов бошловчилик вазифасини ўз зиммасига олди. Фарғоналик икки ижодкор концертларда бир-бирини шу тарзда қўллаб-қувватлайди.

— Кечаги сеансдан у қадар қониқмагандим. Бугунги кундан кўнглим тўляпти, ҳаммаси зўр. Концертда 15 тача премера қўшиқ бор, қолгани эски қўшиқлар. Кеча жами 34 та қўшиқ айтибман. Дастур ҳам уч соатга яқин давом этди. Хоҳлаган қўшиғингизни айтиб бераман, деб қўйганим учун шундай бўлди, деди Жалолиддин Аҳмадалиев.

Хонанданинг сўзларига кўра, концерт тўйдек ўтмоқда. У ҳали концертга тушмаган мухлисларига, албатта, келишни тавсия қилди.

— Концерт кичик тўйдек ўтяпти, тўрт йилдан буён шундай. Тўйларда ҳам шундай-ку, мухлислар фалон қўшиқни айтиб беринг, деб кетади. Фақат “қистир”и йўқ. Фарқи шунда.

Концертга бир ҳафта тайёрландим. Ундан олдин ҳам тайёргарликлар бўлди, фақат чала бўларди. Тўйдан келиб озгина тайёрланардик, деди хонанда.

Жалолиддин Аҳмадалиев Ўзбекистонда илк бор сунъий интеллект ёрдамида тарихий клип яратаётган биринчи ижодкор бўлади. Унинг Ватан ҳақидаги қўшиғи клипи тез кунларда премера қилинади.

— Клип номи “Темур бўлинг” деб номланади. Амир Темур номидан биз фарзандларга айтилган сўзлар бўлади. Инсонни руҳлантириб, ватанга муҳаббатини оширадиган қўшиқ бўлган.

Қўшиқ клипи устида узоқ ўйландик ва сунъий интеллект ёрдамида яратишга қарор қилдик. Бошқа йўналишда сунъий интеллект ёрдамида яратилган клиплар бордир, лекин тарихийсини биринчи биз қиляпмиз, менимча. Клипда Амир Темур ва бошқа тарихий шахслар жонланади.

Аслида клип анча аввал премера бўлиши керак эди, аммо баъзи камчиликлари сабаб чиқаролмай турибмиз. Харажати учун унча кўп маблағ кетмади. У график дизайнернинг ишига қараб баҳоланар экан. Қиммат бўлмаса-да, кўнглимиздагидек қилиб идеал қилиб беряпти, дейди Жалолиддин Аҳмадалиев янги клипи ҳақида.

Концерт ёрқин лаҳзаларга бой ўтди. Мухлислар шўх қўшиқларга рақсга тушиб, оғир қўшиқларда кўз ёшларини тўхтатолмади. Она ҳақида куйланган қўшиқ барчага бирдек ёққан ва йиғлатгани бўлди.

Концертдан тўлиқ репортажни Daryo Lifestyle YouTube саҳифасида томоша қилинг.