Ўзбекистонда 2025—2026 йилларда сунъий интеллект технологиялари соҳасида устувор лойиҳаларни амалга ошириш чора-тадбирлари тўғрисидаги ҳукумат қарори қабул қилинди. Ҳужжат билан шу йиллар давомида Рақамли технологиялар вазирлиги тизимидаги ҳамда уларнинг иштирокидаги ташкилотлар томонидан сунъий интеллект технологияларини жорий этиш бўйича устувор лойиҳалар рўйхати тасдиқланди.
Унга кўра, сунъий интеллект ёрдамида дори воситаларига бозор эҳтиёжларини таҳлил ва прогноз қилиш учун дастурий маҳсулот ишлаб чиқилади. 2025 йил октябргача тизимни ишлаб чиқиш ва жорий этишда хорижий тажриба ўрганилиши ҳамда лойиҳа техник ҳужжатлари ишлаб чиқилиши лозим. 2027 йил февралидан тизим синов тариқасида “Фармацевтик маҳсулотлар хавфсизлиги маркази” ДМда ишга туширилади. Ўша йилнинг июлидан эса тизимни тўлиқ ишга тушириш режалаштирилган.
Шунингдек, клиник қарорлар қабул қилишни автоматлаштириш ва қўлллаб-қувватлаш ҳамда тиббий ёрдам сифатини оширишга мўлжалланган сунъий интеллектга асосланган рақамли тиббий ёрдамчи дастурий таъминоти ишлаб чиқилади. 2025 йил сентябригача лойиҳа техник ҳужжатлари ишлаб чиқилади, 2026 йил октябридан эса тизим синов тариқасида Тошкентнинг Олмазор туманидаги кўп тармоқли марказий поликлиникаси ҳамда “Шох сарой” хусусий клиникасида ишга туширилади. Ўша йилнинг декабрида эса тизимни тўлиқ ишга тушириш кўзда тутилган.
Бундан ташқари, кўкрак қафасидаги тугунлар, ўсмалар, яллиғланиш жараёнлари ва бошқа паталогик ўзгаришларни эҳтимолий аниқлаш мақсадида сунъий интеллект ёрдамида компьютер томографияси ва рентген тасвирларини таҳлил қиладиган дастурий маҳсулот ишлаб чиқилиши режалаштирилган.
Соғлиқни сақлаш ва фармацевтика саноати соҳаларидан ташқари, транспорт, логистика, ва жамоат хавфсизлигини таъминлаш соҳаларида, экология, саноат, хизмат кўрсатиш ва бошқа соҳаларда сунъий интеллект технологияларини жорий этиш назарда тутилмоқда.
Ўзбекистонда “Сунъий интеллект технологияларини 2030 йилга қадар ривожлантириш стратегиясини тасдиқлаш тўғрисида”ги президент қарори қабул қилинганди. Унга кўра, сунъий интеллект асосида яратилган дастурий маҳсулотлар ва кўрсатиладиган хизматлар ҳажмини 1,5 миллиард АҚШ долларига етказиш режалаштирилган. Сунъий интеллектга тайёрлик индексида (Government AI Readiness Index) Ўзбекистонни биринчи 50 та ўриндаги давлатлар қаторига киришига эришиш мақсад қилинган.
Изоҳ (0)