Берлин эндиликда иттифоқчиси Киевни баллистик ракеталарга қарши Patriot тизими учун ракеталар билан АҚШдан мустақил равишда таъминлай олади. Боиси мамлакат уларни маҳаллий ишлаб чиқаришни бошлади.
Бу ҳақда Германиянинг Украина бўйича ёрдам ташаббусларини мувофиқлаштирувчи генерал Кристиан Фреудинг баёнот берди. Бироқ Германия Украинанинг эҳтиёжларини тўла қондира оладими ёки бу АҚШ ёрдамига тўлдирувчи бўладими, ҳозирча номаълум.
Германиялик қўмондон бундан ташқари, узоқ масофага зарба бера оладиган қуроллар заруратини ҳам таъкидлади.
“Бизга Россия ҳудудининг ичкарисига кириб бориб, омборлар, қўмондонлик пунктлари, аэродромлар ва самолётларни нишонга оладиган қурол тизимлари зарур”, деган у.
Хабар қилинишича, Германияда ишлаб чиқарилган Patriot ракеталари Украинага 2026–2027 йилларда етказиб берилади. Берлин иттифоқчисини бундай қурол тизимлари билан таъминлашга тайёрлигини билдирди.
Бироқ генерал Фреудингнинг сўзларига кўра, Германия Украинага узоқ масофали зарбдор қуролларни шу ой охиригача етказиб бера бошлайди. Бу икки давлат Мудофаа вазирликлари май ойида келишган битим доирасида амалга оширилади.
“Бу яқин ҳафталар ва ойлар ичида Украинанинг ҳаво мудофааси ва жанговар салоҳиятини сезиларли даражада кучайтиради”, деди у.
2025 йил учун Украинага ҳарбий ёрдам
НАТО саммитида қабул қилинган қарорга кўра, 2025 йилда Украинага ажратиладиган ҳарбий ёрдам 50 миллиард евродан ошади. Маблағлар, жумладан, Украина қуролли кучлари учун сунъий йўлдош алоқаларини қўллаб-қувватлашга йўналтирилади. Норвегия эса Украинага дронлар учун 640 миллион евро миқдорида маблағ ажратишини ваъда қилган.
Шунга қарамай, Германия Мудофаа вазирлиги Украинага ажратилиши режалаштирилган ҳарбий ёрдам бюджетида деярли 1 миллиард евро камомад юзага келганини қайд этди.
Мудофаа вазири Борис Писториус ёрдам ҳажми 9,2 миллиард евро бўлишини билдирган эди, бироқ кейинчалик расмий бюджет лойиҳасида бу рақам 8,3 миллиард еврога тушиб қолгани маълум бўлди.
Изоҳ (0)