Жаҳон соғлиқни сақлаш ташкилотининг янги ҳисоботига кўра, ҳар соатда Ер юзида тахминан 100 киши ёлғизлик билан боғлиқ турли омиллар сабабли вафот этмоқда. Бу йилига деярли 900 минг ўлим ҳолати қайд этилишини англатади. Мазкур маълумотлар ижтимоий изоляция бўлиш сабаблари ва оқибатларига бағишланган таҳлилий ҳужжатда баён этилди.
Экспертлар баҳолашича, бугунги кунда дунё бўйлаб ҳар олтинчи инсон ўзини доимий равишда ёлғиз ҳис қилади. ЖССТ ёлғизликни инсон хоҳлаган ижтимоий муносабатлар билан ҳақиқий алоқалари ўртасидаги фарқдан келиб чиқадиган оғриқли ҳиссиёт сифатида таърифлайди. Ижтимоий изоляция эса яққол ижтимоий алоқаларнинг йўқлиги билан тавсифланади. Мутахассисларнинг фикрича, ҳар иккала ҳолат ҳам руҳий ва жисмоний саломатлик учун жиддий хавф туғдиради, шу билан бирга, иқтисодиёт ва жамият ривожига ҳам салбий таъсир кўрсатади.
ЖССТ раҳбари Тедрос Гебреесуснинг таъкидлашича, агар ушбу муаммони бартараф этиш учун керакли чоралар кўрилмаса, ёлғизлик глобал миқёсда янада кенг тарқалиб, салбий оқибатларга олиб келиши мумкин.
Ташкилот маълумотларига кўра, ёлғизликка энг кўп дучор бўлаётган инсонлар тоифаси бу ўсмирлар ва ёшлар ҳисобланади. Айниқса, бу ҳолат даромади паст ва ўртача бўлган мамлакатларда яшовчи аҳоли орасида кенг тарқалган. 13 ёшдан 29 ёшгача бўлган ҳар беш кишидан бири ўзини тез-тез ёлғиз ҳис қилади. Ўсмирлар орасида бу кўрсаткич, айниқса, юқори бўлиб, паст даромадли давлатларда ёлғизликни бошдан кечираётган ёшлар улуши 24 фоизни ташкил этади. Бу эса юқори даромадли мамлакатлардаги кўрсаткичдан деярли икки баробар кўпдир.
Ёлғизликнинг юзага келишига бир қатор омиллар сабаб бўлмоқда. Улар қаторида соғлиқ муаммолари, иқтисодий етишмовчилик, ижтимоий инфратузилманинг заифлиги, яшаш шароитидаги, давлат томонидан кўрсатиладиган ёрдамнинг етишмаслиги ва интернетнинг салбий таъсири қайд этилган. Ҳисобот муаллифлари, айниқса, ёшлар орасида интернетда ҳаддан ташқари кўп вақт ўтказиш ва онлайн мулоқот бегоналашув ҳиссини кучайтириши мумкинлигини алоҳида таъкидлаб ўтган.
Изоҳ (0)