Кўпгина сайёҳлар таътилдан қайтгач, бунинг оқибатлари ҳақида ўйламасдан, дарҳол чамадонини каравотга қўйишади. Бироқ микробиологлар бундай одат ўйлаганимиздан ҳам хавфлироқ бўлиши мумкинлигидан огоҳлантирди, деб ёзади Tengri Travel Daily Mail’га таяниб.
Янги тадқиқотга кўра, чамадонларнинг ғилдираклари жамоат ҳожатхоналарининг ўриндиғига қараганда деярли 58 баравар ифлос бўлиши мумкин. Тадқиқотчилар юкнинг ғилдираклари, асоси ва тутқичини текширди — натижалар хавотирли эди.
Чамадон нимаси билан хавфли?
Асосий муаммо — аэропорт, кўча ва ҳожатхоналарда ғилдиракларнинг турли юзаларга тегиб туришидир. Тадқиқотда иштирок этган микробиолог Эми-Мей Пойнтернинг сўзларига кўра, юклар том маънода балчиқда думалаб, патогенлар, моғор ва бошқа микробларни ўзида тўплайди, сайёҳ уларни беихтиёр уйига — гиламлар, каравотлар ва ҳатто овқатланиш столларига олиб келиши мумкин.
“Чамадонлар — айниқса, уларнинг ғилдираклари ва туби микроблар учун ҳақиқий магнитдир. Улар ифлосланиш даражаси бўйича ҳожатхонадан осонгина ўтиб кетишлари мумкин. Аммо яхши янгилик шундаки, оддий гигиена чоралари бактерияларнинг тарқалишини тўхтатишга ёрдам беради,” деди мутахассис.
“Саёҳатчи микроблар”дан қандай ҳимояланиш мумкин?
Микробиолог бир нечта тавсиялар берди:
- чамадонни махсус тагликда сақлаш. Аксарият меҳмонхоналарда юкхоналар мавжуд. Агар улар бўлмаса — душ учун пластик қалпоқчалардан фойдаланиш мумкин;
- кўлмаклар ва ифлос юзалардан сақланинг. Бу ҳар доим ҳам мумкин эмас, айниқса шошилганда, лекин ғилдиракларга қанча кам “ахлат” тушса, уйга шунча кам бактерия олиб келасиз;
- чамадонни ушлагандан сўнг қўлларни ювиш. Багаж тутқичлари ҳам кир йиғади;
- уйга қайтган заҳоти чамадонни дезинфекция қилиш. Антисептикли салфеткалардан ёки совунли эритмали латтадан фойдаланинг;
- агар конструкция имкон берса, олинадиган ғилдиракларни ювиш. Уларни илиқ сувда совун билан ивитиш мумкин;
- мато халтачаларни чангютгичдан ўтказинг ва озиқ-овқат содаси ёки эритмали юмшоқ чўтка ёрдамида моғордан тозаланг.
Мутахассиснинг сўзларига кўра, саёҳатда багажнинг тозалигини назорат қилиш жуда муҳим. Чамадон доимо кўплаб потенциал хавфли микроблар билан алоқада бўлади, шунинг учун хавф юқори.
“Биз юкларимиз бактерия ташувчиси эканлиги ҳақида камдан-кам ўйлаймиз. Аммо оддий қоидаларга риоя қилсангиз, уйингизга микробларнинг киришига осонгина йўл қўймаслик мумкин”, дея хулоса қилди у.
Илгари мутахассислар нима учун ҳаммом меҳмонхонадаги энг хавфсиз юкхона эканини тушунтириб берган эди. Мутахассисларнинг таъкидлашича, 2023 йилда Парижда кузатилган ётоқ каналарининг глобал эпидемиясидан сўнг саёҳатчилар эҳтиёткор бўлиб қолишган. Ҳаммом — бу каналар учун бошпана бўла оладиган гилам, чойшаб ва пардалар каби мато юзалари бўлмаган хонадаги кам сонли жойлардан биридир.
Изоҳ (0)