Франция қон қуйиш маркази (EFS) 48-қон гуруҳлари тизими очилганини маълум қилди. Унинг ташувчиси Парижда яшовчи Кариб денгизидаги Гваделупа оролидан бўлган аёл бўлиб чиқди. Янги қон тури беморнинг келиб чиқишига кўра Gwada negative номини олди. Ушбу кашфиёт Халқаро қон қуйиш ассоциацияси (ISBT) томонидан 2025 йил июнь ойида Миланда бўлиб ўтган конференцияда расман тан олинди.
Камдан-кам учрайдиган ҳолат биринчи марта 15 йил олдин қайд этилган, ўшанда 54 ёшли беморда операциядан олдинги стандарт таҳлиллар пайтида илгари номаълум бўлган антитанача топилганди. Фақатгина 2019 йилда олимлар ДНКнинг юқори самарали кетма-кетлиги ёрдамида унинг табиатини — ноёб генетик мутацияни аниқлашга муваффақ бўлди. Бироқ кашфиёт эндигина халқаро миқёсда эътироф этилди ва қон гуруҳларининг жаҳон реестрига киритилди.
EFS тиббий биологи Терри Пейрарнинг сўзларига кўра, аёл бу қон гуруҳини мутацияга учраган ген ташувчиси бўлган ота-онасидан мерос қилиб олган. Олимнинг таъкидлашича, бемор бундай қон турига эга бўлган ягона маълум шахс бўлиб, донор сифатида фақат ўзига мос келади.
Энди тадқиқотчилар ноодатий қон гуруҳларига эга беморларга тиббий ёрдам кўрсатиш сифатини яхшилаш учун ушбу кам учрайдиган турга эга бошқа одамларни топишга умид қилмоқда. EFS маълумотларига кўра, замонавий ДНК таҳлил усуллари янги тизимларнинг кашф этилишини тезлаштирди, бу эса кам учрайдиган ҳолатлар учун донорларни топиш имкониятини оширади.
Аввалроқ япон олимлари барча гуруҳларга мос келадиган универсал қонни ишлаб чиққан эди.
Изоҳ (0)