Замонавий ҳаёт тарзи инсон саломатлигида бир қатор муаммоларни юзага келтирмоқда. Узоқ вақт давомида компьютер қаршисида ўтириш, жисмоний ҳаракатнинг камайиши ва пассив турмуш тарзи айниқса бел ва орқа мушакларида оғриқ пайдо бўлишига сабаб бўлмоқда. Мутахассислар бу ҳолатни “цивилизация касалликлари” қаторига киритади.
Сўнгги йилларда сурункали бел оғриғи бутун дунё бўйлаб кенг тарқалган ҳолатга айланган. Жаҳон соғлиқни сақлаш ташкилоти маълумотларига кўра, бу оғриқ меҳнатга лаёқатсизликнинг етакчи сабабларидан бири бўлиб, ҳар йили соғлиқни сақлаш тизимига катта харажатларни келтириб чиқаради. Тиббий таснифга кўра, белдаги оғриқ уч ойдан ортиқ давом этса, у сурункали деб баҳоланади.
Норвегиянинг Фан ва технологиялар университети (NTNU) олимлари бу борада қизиқарли тадқиқот ўтказди. Унга кўра, ҳар куни пиёда юриш сурункали бел оғриғининг олдини олишда самарали восита бўлиши мумкин. Олимлар 11 мингдан ортиқ Норвегия фуқароларининг соғлиғи ва жисмоний фаоллигини кузатиб, уларнинг юриш одатларини таҳлил қилишди. Тадқиқотда қатнашганлар бир ҳафта давомида акселерометр деб аталувчи махсус қурилма тақиб юришди. Бу мослама юриш давомийлиги ва тезлигини аниқ ўлчаб боради. Шундан сўнг олимлар иштирокчиларнинг соғлиғини тўрт йилдан ортиқ вақт давомида кузатди.
Таҳлил натижалари шуни кўрсатдики, кунига камида 100 дақиқа пиёда юрганлар орасида бел оғриғининг вужудга келиш хавфи 23 фоизга камроқ бўлган. Энг яхши натижалар эса ўртача тезликда, аммо мунтазам ва етарлича узоқ юрган одамларда кузатилган. Шу билан бирга, юриш тезлиги муҳим бўлса-да, асосий омил бу юришнинг давомийлиги экани таъкидланган.
Пиёда юриш оддий, аммо самарали машғулот бўлиб, спортзалга боришни, залга абонемент харид қилишни, махсус ускуналар сотиб олишни ёки мураббий ёллашни талаб қилмайди. Ҳар куни юришга атиги бир соат вақт ажратишнинг ўзи бел саломатлигини сақлаш учун етарли бўлиши мумкин.
Шифокорлар ушбу хулосани қўллаб-қувватлаб, одамларни ишга пиёда юриш, лифт ўрнига зинадан фойдаланиш ёки овқатдан кейин қисқа сайр қилиш каби майда одатларни кундалик ҳаётга киритишга ундамоқда. Бу оддий чоралар ёрдамида нафақат бел оғриғи, балки юрак-қон томир ва бошқа ҳаракатсизлик билан боғлиқ касалликларнинг олди олинади.
Изоҳ (0)