Америкалик тадбиркор ва АҚШ Давлат бошқаруви самарадорлиги департаменти (DOGE)нинг собиқ раҳбари Илон Маск хусусий компанияларга оид махфий маълумотларга эга бўлган. Бу ҳақда The Washington Post (WP) газетаси хабар бермоқда.
Таъкидланишича, Маск бу маълумотлардан рақобатчиларга қарши курашда фойдаланиши мумкин. Текширув натижаларига кўра, DOGE камида еттита йирик департамент ёки агентликда рақобатчиларнинг тижорат сирлари, давлат шартномалари тўғрисидаги ошкор этилмаган маълумотлар ва махфий тартибга солиш ҳаракатлари ёки бошқа маълумотларни ўз ичига олган ёзувларни кўриш ҳуқуқини қўлга киритган.
“Биз ҳукуматга тақдим этадиган кўплаб маълумотлар рақобат нуқтаи назаридан махфий ҳисобланади. Буни амалга оширганимизда улар ҳимояланган деб ўйлаймиз. Энди эса заиф эканлигимиз маълум бўлиб қолди”, деди Маскнинг рақобатчиларидан бири.
Қайд этилишича, маълумотлардан ноқонуний фойдаланишнинг бевосита далиллари топилмаган, бироқ DOGE камида еттита федерал агентликнинг махфий маълумотларига — NASА шартномаларидан тортиб америкаликларнинг молиявий маълумотларигача кириш имкониятига эга бўлган.
Бундан аввал Илон Маск агар АҚШ президенти Дональд Трампнинг солиқ имтиёзлари тўғрисидаги қонун лойиҳаси қабул қилинса, янги партия тузиш билан таҳдид қилганди. Бунга жавобан АҚШ президенти Дональд Трамп Илон Маск бошқараётган Давлат самарадорлиги департаментига (DOGE) тадбиркорнинг ўзини текширишни таклиф этди.
Февраль ойида Илон Маск раҳбарлик қиладиган АҚШ Давлат бошқаруви самарадорлиги департаменти (DOGE) ходимлари миллионлаб давлат хизматчиларининг махфий маълумотларига кириш ҳуқуқига эга бўлгани айтилганди.
Изоҳ (0)