Тошкент халқаро аэропортида одам савдосининг олди олинди. Бу ҳақда Самарқанд вилояти ИИБ матбуот хизмати хабар қилди.
Хабарда айтилишича, 21 июнь куни Тошкент халқаро аэропорти ҳудудида одам савдоси билан боғлиқ навбатдаги жиноий фаолиятнинг олди олинди. Тошкент шаҳрида яшовчи 53 ёшли аёл жиноий гуруҳ ташкил қилиб, моддий қийинчиликда қолган 31, 23 ва 18 ёшли уч нафар қизни Таиланд Қироллигига фоҳишалик қилиш мақсадида жўнатишни режалаштирган.
ИИВ Тезкор-қидирув департаменти, Самарқанд вилояти ИИБ ва ДХХ ҳамкорлигида ўтказилган махсус тадбир натижасида аёл аэропортда, қизларни юбориш пайтида ашёвий далиллар билан қўлга олинган.
Аёлнинг Таиланддаги 53 ёшли эркак таниши ушбу қизларни кутиб олиб, иш билан таъминлаши эвазига 5000 АҚШ доллари юбориши ва уч ой мобайнида фоҳишалик қилиб, пул ишлаб бериши шарти билан келишиб олинган бўлган.
Унга нисбатан Жиноят кодексининг 135-моддаси (одам савдоси) бўйича жиноят иши қўзғатилган ва у процессуал тартибда қамоққа олинган.
Бундай ҳолатлар сони ортиб бормоқда
Март ойида Тошкентда 22 ёшли аёл икки тенгдошини Россияга сотиб юбораётганда қўлга олинганди. Июнь ойида Тошкент вилоятида қизларни фоҳишалик учун Туркияга жўнатаётган аёл ушланди.
Августда эса Тошкент аэропортида 20 ёшли қизни алдаб, Дубайга фоҳишаликка юбораётган эркак ушланганди.
Шунингдек, Тошкент халқаро аэропортида аёл Туркияга 20 ёшли қизни фоҳишалик учун жўнатаётган вақтда ушланган.
Изоҳ (0)