АҚШ президенти Дональд Трамп 2004 йилдан бери амалда бўлган Сурияга қарши иқтисодий санкцияларни бекор қилиш тўғрисидаги фармонни имзолади. Бу ҳақда BBC хабар берди.
Оқ уй Сурияга нисбатан санкцияларининг бекор қилинишини “барқарорлик ва тинчлик сари қадам” дея баҳолаган.
“Қўшма Штатлар қўшнилари билан барқарор, бирлашган ва тинч давлат Сурияни қўллаб-қувватлайди. Террорчи ташкилотларга хавфсиз бошпана бермайдиган, ўзининг диний ва этник озчиликлари хавфсизлигини таъминлайдиган бирлашган Сурия минтақавий хавфсизлик ва фаровонликни таъминлайди”, дейилади фармонда.
Россияга қочиб ўтган Сурия собиқ президенти Башар Асад, унинг оила аъзолари ва ағдарилган режим тарафдорларига қарши санкциялар амалда қолмоқда.
Трамп Суриянинг янги раҳбари Аҳмад аш-Шараъа билан 14 май куни Ар-Риёдда учрашган эди. У учрашувдан олдин Сурияга қўйилган санкцияларни бекор қилишини айтган. Оқ уй эса Суриянинг янги ҳукумати ҳаракатларини, жумладан, “Исроил билан муносабатларни нормаллаштириш қадамларини” кузатиб боришини маълум қилган.
Сурия ташқи ишлар вазири Асад аш-Шибонийнинг айтишича, санкцияларнинг бекор қилиниши Суриянинг иқтисодий тикланиши йўлидаги тўсиқларни олиб ташлайди ва мамлакатни халқаро ҳамжамият учун очади. АҚШ молия вазири Скотт Бессент ўз баёнотида санкцияларни юмшатиш тўғрисидаги буйруқ Сурия халқига “шафқатсиз Асад режими ағдарилганидан кейин ҳаётни янгидан бошлаш имкониятини” беришини айтган.
“Бугунги ҳаракатлар Сурия иқтисодиётини жаҳон савдосига бирлаштириш ва мамлакат инфратузилмасини қайта қуришга ёрдам беради”, деган Бассент.
Изоҳ (0)