Миллиардер Илон Маск агар АҚШ президенти Дональд Трампнинг солиқ имтиёзлари тўғрисидаги қонун лойиҳаси қабул қилинса, янги партия тузиш билан таҳдид қилди.
Маск қонун лойиҳасини қўллаб-қувватлайдиган конгрессменлар 2026 йилда бўлиб ўтадиган праймеризда ютқазишини айтган эди.
Агар бу аҳмоқона харажатлар тўғрисидаги қонун лойиҳаси қабул қилинса, эртаси куни Америка партияси тузилади. Мамлакатимизга демократлар ва республикачиларнинг бир партияли тизимига муқобил вариант керак, токи халқ ҳақиқатан ҳам ОВОЗ бера олсин, деб ёзган Маск Х ижтимоий тармоғида.
Трампнинг жавоби
АҚШ президенти бунга жавобан Маскка унинг электромобиллари учун берилган субсидияларни эслатиб ўтган. Сиёсатчи электромобилларга қарши эканини ва Маск буни сайловдан олдин уни қўллаб-қувватлаганида билганини айтган.
Электромобильлар яхши, аммо ҳар кимни уларни сотиб олишга мажбурлаш тўғри эмас. Эҳтимол, Илон бошқаларга қараганда тарихда энг кўп субсидия олган шахс бўлиши мумкин, уларсиз у ўз бизнесини ёпиб, уйига — Жанубий Африкага қайтишга мажбур бўларди. Натижада ракеталарни учириш, сунъий йўлдошлар ёки электромобиллар ишлаб чиқариш тўхтатилиб, мамлакатимиз катта маблағни тежаб қоларди. Эҳтимол, биз DOGEъга бу масалани синчиклаб ўрганишни топширишимиз керакдир? КАТТА ПУЛ ТЕЖАЛАДИ!!! деб ёзган Трамп Truth Social саҳифасида.
CNN телеканалига кўра, Илон Маскнинг баёноти у май ойи охирида АҚШ президенти маъмуриятидан кетганидан кейин билдирган энг жиддий сиёсий таҳдиддир. Маск АҚШдаги Республикачилар партиясининг энг йирик донори ҳисобланади. Бизнесмен 2022 йилда республикачилар фойдасига катта миқдорда оммавий хайриялар қилиш орқали партияни қўллаб-қувватлашни бошлаган.
Илон Маск ва Дональд Трамп июнь ойи бошида юқоридаги қонун лойиҳаси устида зиддиятга борган эди. Миллиардер бу ташаббусни “жирканч” деб атаган ҳамда иқтисодиёт учун салбий оқибатларга олиб келишини айтган. АҚШ президенти эса Илон Маск қонун лойиҳасидан жуда яхши хабардорлиги, тадбиркор электромобиллар учун имтиёзлар бекор қилинаётгани сабаб норози бўлаётганини таъкидлаган. Бунга жавобан Маск АҚШ президентини ёлғончиликда айблаганди.
Кейинчалик миллиардер президент ҳақидаги бир нечта постлари учун узр сўраб, “ҳаддан ошиб кетганини” тан олган. Америка етакчиси, ўз навбатида, Маскнинг узрларини “жуда самимий” деб атаганди.
Баҳсли қонун лойиҳаси
Қонун лойиҳаси Дональд Трамп 2017 йилда ўзининг биринчи президентлик даврида жорий қилган солиқ имтиёзларини узайтиради. Жумладан, АҚШ мудофааси ва чегараларини қўриқлаш харажатларни ошади ва баъзи ижтимоий дастурларни молиялаштириш қисқаради. Трамп ҳужжатни “катта ва ажойиб қонун” деб атаган.
Вакиллар палатаси қонун лойиҳасини май ойида қабул қилган. Сенат июнь ойи охирида бўлиб ўтган процессуал овоз бериш жараёнида ҳужжатни қўллаб-қувватлаган Сенаторлар якуний овоз беришни 4 июлга қадар ўтказмоқчи.
Изоҳ (0)