Жаҳон Шахмат Федерацияси июнь ойи якунлангач, ўз рейтингини янгилади. Янгиланган рейтингда кучли 100 талик рўйхатга 5 нафар ўзбекистонлик гроссмейстер киришни уддалади.
Норвегиялик Магнус Карлсен ҳали ҳам FIDE рейтингида етакчилик қилмоқда. Ҳозирда унинг ҳисобида 2839 очко мавжуд. Иккинчи поғонани америкалик Ҳикару Накамура (2807) эгаллаган бўлса, кучли учликка яна бир АҚШ вакили Фабиано Каруана (2784) якун ясаган.
Ўзбекистонлик гроссмейстер Нодирбек Абдусатторов бир поғона пастлади. У охирги бир неча ой давомида 6-ўринда эди, аммо июнь якунларига кўра 7-поғонага тушди. Ҳозирда унинг ҳисобида 2771 очко бор. Ҳиндистонлик Праггнанандҳаа Рамешбабу Тошкентда ўтган UzChess Cup мусобақасида ғалаба қозониб, ўз рейтингига 11,3 очко қўшди. Натижада у FIDE рейтингида 3 поғона юқорилаб, 4-ўринга кўтарилди. Шу сабабли Абдусатторов бир поғона пастлади.
Тошкентда ўтган UzChess Cup мусобақасининг Masters гуруҳида иккинчи ўринни эгаллаган Жавоҳир Синдоров янгиланган рейтингда 25-ўринга кўтарилди. У ўтган ойга нисбатан 4 поғона юқорилади ва ҳозирда унинг ҳисобида 2722 очко мавжуд.
Энг кучли шахматчилар қаторида Рустам Қосимжонов ҳам бор. У 2675 очко билан 48-поғонани эгаллади. Қосимжоновнинг рейтинг баллари ўтган ойга нисбатан ўзгаришсиз қолган, бироқ у 1 поғона пастлади. Шунингдек, Нодирбек Якуббоев 59-поғонадан (2663 очко), Шамсиддин Воҳидов эса 76-ўриндан (2650 очко) жой олди. Якуббоев ўтган ойга нисбатан 6 поғона юқорилаган бўлса, Воҳидов 5 поғонага кўтарилди.
Ёшлар рейтингида эса Жавоҳир Синдоров 2722 очко билан кучли учликда қолди.
Изоҳ (0)