Оқ уй Пентагонга ва АҚШ Аэронавтика ва космик тадқиқотлар миллий бошқармасига (NASA) америкалик миллиардер Илон Маскка тегишли SpaceX компанияси билан тузилган йирик давлат шартномаларини ўрганишни топширди. Бу ҳақда Reuters хабар бермоқда.
Бундай топшириқ идораларга АҚШ президенти Дональд Трамп ва Маск ўртасида авж олган можаро фонида берилган. SpaceX ва маъмурият ўртасидаги шартномаларнинг умумий қиймати тахминан 22 миллиард долларни ташкил этади.
Буйруқ ҳақида хабардор шахсларнинг айтишича, шартномаларни текшириш маъмуриятга, агар Трамп яқинда президентнинг бош маслаҳатчиси ва харажатларни қисқартириш билан шуғулланувчи Ҳукумат самарадорлиги департаменти (DOGE) раҳбари бўлган Маскка қарши чора кўришга қарор қилса, тезкор ҳаракат қилиш имкониятини беради. Суҳбатдошлардан бири текширув “сиёсий қурол учун” ўтказилаётганини таъкидлаган.
АҚШ ҳукуматининг амалдаги шартномаларни қонуний ёки амалий жиҳатдан бекор қила олиши ноаниқ. Бироқ бу эҳтимоллик бошқарув соҳасидаги мутахассисларнинг сиёсат ва шахсий адоват давлат хазинаси, миллий хавфсизлик ва жамоат манфаатларига дахлдор масалаларга ноўрин таъсир кўрсатиши мумкинлиги ҳақидаги ташвишларини янада кучайтирмоқда.
Маск ва Трамп ўртасидаги можаро июнь ойи бошида президент томонидан таклиф қилинган харажатларни қисқартириш тўғрисидаги қонун лойиҳаси туфайли авж олди. Тадбиркор бу лойиҳани “жирканч разолат” деб атади. Бунга жавобан республикачи тадбиркордан кўнгли қолганини айтиб, унинг компанияларига кўрсатилган ёрдамни эслатиб ўтди.
Шундан сўнг маълум бўлишича, Маск Трамп билан телефон орқали гаплашиб, сиёсатчига нисбатан айтган кескин сўзларидан пушаймон эканини оммага маълум қилишдан олдин мулоқот қилган. Манбаларга кўра, миллиардер Қўшма Штатлар раҳбарига қўнғироқ қилишдан аввал АҚШ вице-президенти Жей Ди Венс ва Оқ уй раҳбари Сюзан Уайлс билан ҳам суҳбатлашган.
Изоҳ (0)