Fransiya qon quyish markazi (EFS) 48-qon guruhlari tizimi ochilganini maʼlum qildi. Uning tashuvchisi Parijda yashovchi Karib dengizidagi Gvadelupa orolidan bo‘lgan ayol bo‘lib chiqdi. Yangi qon turi bemorning kelib chiqishiga ko‘ra Gwada negative nomini oldi. Ushbu kashfiyot Xalqaro qon quyish assotsiatsiyasi (ISBT) tomonidan 2025-yil iyun oyida Milanda bo‘lib o‘tgan konferensiyada rasman tan olindi.
Kamdan-kam uchraydigan holat birinchi marta 15 yil oldin qayd etilgan, o‘shanda 54 yoshli bemorda operatsiyadan oldingi standart tahlillar paytida ilgari nomaʼlum bo‘lgan antitanacha topilgandi. Faqatgina 2019-yilda olimlar DNKning yuqori samarali ketma-ketligi yordamida uning tabiatini — noyob genetik mutatsiyani aniqlashga muvaffaq bo‘ldi. Biroq kashfiyot endigina xalqaro miqyosda eʼtirof etildi va qon guruhlarining jahon reyestriga kiritildi.
EFS tibbiy biologi Terri Peyrarning so‘zlariga ko‘ra, ayol bu qon guruhini mutatsiyaga uchragan gen tashuvchisi bo‘lgan ota-onasidan meros qilib olgan. Olimning taʼkidlashicha, bemor bunday qon turiga ega bo‘lgan yagona maʼlum shaxs bo‘lib, donor sifatida faqat o‘ziga mos keladi.
Endi tadqiqotchilar noodatiy qon guruhlariga ega bemorlarga tibbiy yordam ko‘rsatish sifatini yaxshilash uchun ushbu kam uchraydigan turga ega boshqa odamlarni topishga umid qilmoqda. EFS maʼlumotlariga ko‘ra, zamonaviy DNK tahlil usullari yangi tizimlarning kashf etilishini tezlashtirdi, bu esa kam uchraydigan holatlar uchun donorlarni topish imkoniyatini oshiradi.
Avvalroq yapon olimlari barcha guruhlarga mos keladigan universal qonni ishlab chiqqan edi.
Izoh (0)