Кўпчилик ширинликлар соғлиқ учун душман эканлиги рост, аммо баъзи ширин таъмли маҳсулотлар танага фойда келтириши, ҳатто юрак-қон томир соғлигига ижобий таъсир кўрсатиши мумкин. Муҳими — тўғри танлов қила олиш. Қуйида фойдали десертлар ва организмни мустаҳкамловчи ширинликлар ҳақида маълумот берамиз.
-_FLgFr52.avif)
Кундалик ширинлик ўрнида табиий маҳсулотлар — олма, банан, турли резавор меваларни истеъмол қилиш тавсия этилади. Бу мевалар ўзига хос табиий ширин таъмга эга бўлиб, витамин ва антиоксидантларга ниҳоятда бой. Улар организмни мустаҳкамлаб, иммунитетни кўтаришда муҳим рол ўйнайди.
Уй шароитида тайёрланадиган десертлар таркибига эса майиз қўшиш айни муддао. Майиз юрак фаолиятини қўллаб-қувватловчи калийга бой бўлиб, ундаги толалар овқат ҳазм қилишни яхшилайди. Шунингдек, темир моддаси миқдорининг юқорилиги сабабли у камқонликнинг олдини олишда самарали восита ҳисобланади.
Ёш улғайгани сайин, айниқса 50 ёшдан кейин, кундалик рациондан шакарни чиқариб ташлаш соғлиқ учун катта фойда келтиради. Бунинг натижасида юрак-қон томир тизими фаолияти яхшиланади, тери ҳолати тикланади, қон босими меъёрлашади, шакар миқдори мувозанатга келади. Энг муҳими, миянинг ишлаш фаолияти кучаяди, фикрлаш равшанлашади.
Шакар истеъмолини камайтириш ширинликлардан бутунлай воз кечиш дегани эмас. Аксинча, фойдали ва табиий десертлар билан овқатланиш маданиятини шакллантириш муҳим. Мисол учун, агар-агардан тайёрланган зефир (у денгиз сувўтларидан олинади) энг яхши альтернативалардан бири. Ёнғоқ билан бойитилган мевали салатлар, қора шоколад, шакарсиз мюсли батончиклари, уй шароитида тайёрланган, мева ҳамда резаворлар билан бойитилган йогурт — барчаси нафақат ширин, балки фойдали ҳамдир.
Албатта, халқимиз севиб истеъмол қиладиган ҳолвани ҳам алоҳида таъкидлаш лозим. Унинг таркибидаги табиий ёғлар, витамин ва минераллар юрак-қон томир тизими фаолиятини яхшилайди, организмга энергия беради, тиш ва суякларни мустаҳкамлайди. Айниқса, ундаги B гуруҳи витаминлари асаб тизимини тинчлантиришда ва стрессни енгишда катта ёрдам беради.
Изоҳ (0)