АҚШ президенти Дональд Трампнинг Эрон ва Исроил ўртасида ўт очишни тўхтатиш бўйича келишувга эришилганини эълон қилиши унинг маъмуриятидаги бир қатор амалдорларни кутилмаганда ҳайратда қолдирган. Бу ҳақда The New York Times газетаси Оқ уйнинг юқори лавозимли вакилига асосланиб хабар бермоқда.
Вакилнинг айтишича, Америка раҳбарининг тўсатдан қилган баёноти ҳатто унинг маъмуриятининг энг юқори мартабали аъзоларини ҳам ҳайратда қолдирган.
Трамп аввалроқ Исроил ва Эрон ўт очишни тўхтатиш тўғрисидаги келишувни у эълон қилганидан тахминан олти соат ўтгач, амалга оширишни бошлашга тўлиқ рози бўлганини маълум қилган эди.
Оқ уй раҳбарининг сўзларига кўра, биринчи бўлиб Теҳрон ўт очишни тўхтатади, 12 соатдан сўнг буни яҳудий давлати амалга оширади, “24 соатда эса дунё 12 кунлик уруш тугаганини нишонлайди”.
Нашр суҳбатдоши келишувларга эришишда Қатар амири шайх Тамим бин Ҳамад ал-Сонийнинг ҳам муайян ҳиссаси борлигини қайд этган. Манбанинг аниқлаштиришича, Америка томонидан келишувга эришишга вице-президент Жей Ди Венс, давлат котиби Марко Рубио ва АҚШ президентининг махсус вакили Стив Уиткофф кўмаклашган. Улар Эрон билан “тўғридан-тўғри ва билвосита” алоқа каналлари орқали иш олиб борган.
АҚШ маъмурияти вакилининг қўшимча қилишича, Исроил Эрон ҳужумларини тўхтатиш шарти билан ўт очишни тўхтатишга рози бўлган, бироқ Теҳроннинг қандай шартларга рози бўлиши мумкинлиги ҳақида аниқлик киритилмаган.
Исроил 13 июнга ўтар кечаси Эронга қарши ҳарбий операция бошлади. Бир суткадан камроқ вақт ўтгач, ислом республикаси жавоб ҳужумини амалга оширди. АҚШ можаро авж олганидан тўққиз кун ўтиб, унга аралашди. 22 июнга ўтар кечаси АҚШ Қуролли кучлари Эроннинг учта ядровий объектига ҳужум қилди. 23 июнь куни кечқурун Теҳрон АҚШнинг Қатардаги Яқин Шарқдаги энг йирик Ал-Удейд авиабазасига ракета зарбасини берди. АҚШ расмийларининг хабар беришича, жабрланганлар йўқ, жиддий зарар етказилмаган.
Изоҳ (0)