AQSHning Eronga bergan zarbalari yadro qurolini yaratish uchun zarur bo‘lgan infratuzilmani yo‘q qilgani haqida mamlakat vitse prezidenti Jey Di Vens ma’lum qilgan. Bu haqda Fox News xabar berdi.
“Birinchidan, prezident bitta ham amerikalik qurbonsiz Eron yadroviy dasturini yo‘q qildi. Biz hozir bir hafta oldin tasavvur qilib bo‘lmaydigan holatdamiz. O‘sha paytda Eron yadro quroliga ega bo‘lishga juda yaqin edi. Endi Eron o‘zida mavjud bo‘lgan uskunalar bilan yadro qurolini yaratishga qodir emas, chunki biz uni yo‘q qildik”, dedi Vens.
Qo‘shma Shtatlar 21-iyun kuni kechqurun “Tungi bolg‘a” operatsiyasi doirasida Eronning Fordo, Natanz va Isfahon yadroviy obyektlariga zarba bergandi. Isfahonga AQSH suvosti kemasidan yigirmadan ortiq Tomahaw raketalari uchirilgan.
“Yakuniy jangovar zararni baholash biroz vaqt talab qiladi. Ammo dastlabki ma’lumotlar shuni ko‘rsatadiki, har uchala obyekt ham o‘ta og‘ir zarar va vayronagarchilikka uchragan”, dedi Shtab boshliqlari birlashgan qo‘mitasi raisi Den Keyn.
Keynning qo‘shimcha qilishicha, missiyada 125 dan ortiq AQSH samolyoti, jumladan B-2 yashirin bombardimonchi samolyotlari, o‘nlab yoqilg‘i quyish tanklari, boshqariladigan raketa suv osti kemasi va boshqalar qatnashgan.
Vensning Fox News’ga aytishicha, Qo‘shma Shtatlar Eron zarbalardan keyin kelajakda yadroviy salohiyatini tiklashga urinmasligiga ishonch hosil qilish uchun harakat qiladi.
“Bu juda zo‘r ish bo‘ldi. Isroil muhim harbiy vazifani uddaladi. Ular bizga Eron yadro dasturini yo‘q qilishda yordam berdi. Shuningdek, yahudiy davlati ularga tahdid solgan Eronning an’anaviy raketa salohiyatini yo‘q qildi”, deb qo‘shimcha qilgan vitse prezident.
Izoh (0)