АҚШ президенти Дональд Трамп 24 июнь куни Исроил ва Эрон ўртасида ўт очишни тўхтатиш кучга кирганини эълон қилди. Бу ҳақда Reuters хабар берди.
АҚШ президенти икки давлатдан сулҳни бузмасликни сўраган.
“Ўт очишни тўхтатиш режими кучга кирди. Илтимос, уни бузманг!” деб ёзган Трамп Truth Social ижтимоий тармоғида.
Трамп бир неча соат олдин жойлаган постида ўт очишни тўхтатиш режимига биринчи бўлиб Эрон риоя қилиши, Исроил эса 12 соатдан кейин ўт очишни тўхтатиш режимига қўшилишини айтганди. У мазкур келишувга “B-2 учувчилари ва Эрон ядровий объектларига зарба беришда иштирок этганларнинг истеъдоди ва жасоратисиз” эришиб бўлмаслигини алоҳида таъкидлаган.
The Times of Israel нашри ҳам ўт очишни тўхтатиш бошланганини эълон қилган. Исроил расмийлари мақола чоп этилган пайтда Трампнинг эришилган сулҳ ҳақидаги баёнотига изоҳ бермаган. Манбаларнинг Исроил матбуотига айтишича, агар барча томонлар уни қўллаб-қувватласа, сулҳ сақланиб қолади.
Исроил 13 июнь куни Эрондаги нишонларга зарба бера бошлаган. Хусусан, у ядровий объектлар, юқори мартабали ҳарбийлар ва ядровий олимларни нишонга олганди. Эрон эса Исроилга зарба бериш билан жавоб қайтаришни бошлаган. Қўшма Штатлар ҳам 22 июнь куни Эронга ҳужум қилиб, 3 та ядровий объектга зарба берган. 24 июнь куни эса Эрон бунга жавобан Қатардаги АҚШ ҳарбий базасига ҳужум қилганди. Томонлар ўртасидаги сулҳга юқоридаги ҳужумлардан сўнг эришилди.
Изоҳ (0)