AQSH prezidenti Donald Trampning Eron va Isroil o‘rtasida o‘t ochishni to‘xtatish bo‘yicha kelishuvga erishilganini e’lon qilishi uning ma’muriyatidagi bir qator amaldorlarni kutilmaganda hayratda qoldirgan. Bu haqda The New York Times gazetasi Oq uyning yuqori lavozimli vakiliga asoslanib xabar bermoqda.
Vakilning aytishicha, Amerika rahbarining to‘satdan qilgan bayonoti hatto uning ma’muriyatining eng yuqori martabali a’zolarini ham hayratda qoldirgan.
Tramp avvalroq Isroil va Eron o‘t ochishni to‘xtatish to‘g‘risidagi kelishuvni u e’lon qilganidan taxminan olti soat o‘tgach, amalga oshirishni boshlashga to‘liq rozi bo‘lganini ma’lum qilgan edi.
Oq uy rahbarining so‘zlariga ko‘ra, birinchi bo‘lib Tehron o‘t ochishni to‘xtatadi, 12 soatdan so‘ng buni yahudiy davlati amalga oshiradi, “24 soatda esa dunyo 12 kunlik urush tugaganini nishonlaydi”.
Nashr suhbatdoshi kelishuvlarga erishishda Qatar amiri shayx Tamim bin Hamad al-Soniyning ham muayyan hissasi borligini qayd etgan. Manbaning aniqlashtirishicha, Amerika tomonidan kelishuvga erishishga vitse-prezident Jey Di Vens, davlat kotibi Marko Rubio va AQSH prezidentining maxsus vakili Stiv Uitkoff ko‘maklashgan. Ular Eron bilan “to‘g‘ridan-to‘g‘ri va bilvosita” aloqa kanallari orqali ish olib borgan.
AQSH ma’muriyati vakilining qo‘shimcha qilishicha, Isroil Eron hujumlarini to‘xtatish sharti bilan o‘t ochishni to‘xtatishga rozi bo‘lgan, biroq Tehronning qanday shartlarga rozi bo‘lishi mumkinligi haqida aniqlik kiritilmagan.
Isroil 13-iyunga o‘tar kechasi Eronga qarshi harbiy operatsiya boshladi. Bir sutkadan kamroq vaqt o‘tgach, islom respublikasi javob hujumini amalga oshirdi. AQSH mojaro avj olganidan to‘qqiz kun o‘tib, unga aralashdi. 22-iyunga o‘tar kechasi AQSH Qurolli kuchlari Eronning uchta yadroviy obyektiga hujum qildi. 23-iyun kuni kechqurun Tehron AQShning Qatardagi Yaqin Sharqdagi eng yirik Al-Udeyd aviabazasiga raketa zarbasini berdi. AQSH rasmiylarining xabar berishicha, jabrlanganlar yo‘q, jiddiy zarar yetkazilmagan.
Izoh (0)