Telegram асосчиси Павел Дуров ўзининг шахсий каналида мессенжер учун янги дастурчи излаётгани ҳақида эълон қилди. У таклиф қилаётган лавозим технология соҳасидаги энг юқори маошли таклифлардан бири бўлиши мумкин: Дуров таклиф қилаётган йиллик иш ҳақи 1 миллион АҚШ долларини ташкил қилади.
Дастурчилик лавозимига фақатгина махсус код ёзиш танловида ғолиб чиққан иштирокчи аризаси қабул қилинади. Танлов муддати 2025 йил 11 июлгача давом этади. Ҳозирда Telegram томонидан танлов тафсилотлари, техник топшириқлар ва талаблар бўйича махсус саҳифа ҳам очилган. Танловда қатнашувчиларга самарали, тезкор ва хавфсиз код ёзиш бўйича мураккаб вазифалар берилади.
Telegram дунё бўйича бир миллиарддан ортиқ фойдаланувчига эга ва унинг хавфсизлик даражаси, тезкор ишлаши кўплаб фойдаланувчилар томонидан юқори баҳоланади. Компания ҳозирда айнан шу устунликларни янада кучайтириш устида ишламоқда.
Дуров илгари ҳам ўз лойиҳаларига энг яхши мутахассисларни жалб қилиш учун танлов эълон қилган. 2019 йилда у худди шундай саралаш орқали дастурчиларни ишга олган.
Аввалроқ Дуров Telegram’ни видеоплатформага айлантирмоқчи эканини айтган эди.
Изоҳ (0)